1115
Ярууна аймагай Комсомольское һууринда соёлой байшан 1970 ондо баригдажа, нэгэшье дахин ехэ заһабарилга хэгдээгүй. 49 жэл үнгэржэ, хүдөөгэй соёлой байшан шэнэлэгдээ. Энэ нютагта 700-һаа дээшэ хүн ажаһуудаг. Тиигэжэ тэдэнэр шэнээр заһабарилагдаһан байшанда һайндэрнүүд, баярай хэмжээ ябуулганууд үнгэргэжэ, тоглолотонуудые табиха аргатай болобо.
Комсомольское һууринда хүүгэдэй болон томошуулай ябаха 8 кружок ажалаа эрхилдэг, тиихэдэ сүлөө сагтаа бильярд болон теннис наадахаар юм.
- Иимэ һаруул, дулаан соёлой байшануудые нээжэ байхада, ехэ урматай. Хүүгэд һайндэрнүүдэй хэмжээ ябуулгануудта хабаадажа, һуража хүмүүжэхэ аргатай болоо. Байгша ондо Ярууна аймагта Комсомольское һууринай соёлой байшан шэнэлэгдээ, Шиирингэдэ, Гүүндэдэ соёлой байшанууд баригдаа, Нарһатада ехэ заһабари хэгдээ. Соёлой һалбари урагшатай хүгжэнэ, - гэжэ Буряад Уласай Толгойлогшо клубай нээлгын баяр ёһололдо хэлэһэн байна.
«Соёл» гэһэн үндэһэн түсэлэй хэмжээндэ Комсомольское һууринай соёлой байшанай ехэ заһабарилгада 5,4 сая түхэриг һомологдоо. Тиигэжэ клубай хушалта, шала, дулаасуулгын тоног хэрэгсэл шэнэлэгдэжэ, сонхонууд табигдаа, түймэрэй гараһан тухай дуулгаха дохёо тохогдоо, бусадшье ажал хэгдэһэн байна. 386 дүрбэлжэн метрэй талмайтай соёлой байшанда тоглолтын танхимһаа гадуур, номой сан ажалаа эрхилхэ.
«Соёл» гэһэн үндэһэн түсэлэй хэмжээндэ Ярууна аймагай Нарһатада, Хяагта аймагай Шараголдо, Захаамин аймагай Шара-Азаргада соёлой 3 байшан заһбарилагдаа. Заһабарилгын ажалда дүн хамта 14,6 сая түхэриг гаргашалагдаа.
2020 ондо уласай 10 аймагай соёлой 4 байшанай ехэ заһабарилгада 62,8 сая түхэриг шэглүүлэгдэхэ. Тиихэдэ энэ намар Кабанск, Сэлэнгэ, Бэшүүр, Захаамин аймагуудта 20 сая түхэригэй автоклубууд дамжуулагдаха. Тэрэшэлэн Буряад Уласай хүүгэдэй урлалай 26 һургуулинууд шэнэ пианинануудтай болохо. Хэжэнгэ, Загарай аймагуудай Северобайкальск, Улаан-Үдэ болон Хяагтын Адагта модельнэ номой сангууд ажалаа эхилхэ. 9 кинозал улас дотор хүдэлжэ эхилхэ юм.
Ородой Холбоото Уласай Юрэнхылэгшын «О национальных целях и стратегических задачах развития Российской Федерации на период до 2024 года» гэһэн Тогтоолой хэмжээндэ «Соёл» гэһэн үндэһэн түсэл байгуулагдажа, 2019 оной январиин 1-һээ бэелүүлэгдэнэ гээд тэмдэглэлтэй.
Буряад Уласай Засагай газарай мэдээсэлэй албанай гэрэл зураг
