​Буряад хатарай гайхамшаг

Гурбан томо гүрэндэ амидаржа байгаа монгол туургатан мүнөө үедэ имагтал соёл уралигайнгаа ашаар нэгэдэн нягтарха аргатай гэжэ мэдээжэ. Тиигэжэ энэ удаа дэлхэйн монголшуудай нэгэн дээбэри доро сугларһан шалтаг гэхэдэ, Хүхэ-Хотодо үнгэрһэн монгол бүжэгэй ехэ наадан. Тэндэ Ород гүрэниие Буряадай «Байгал» театрһаа гадна, Тувагай, Алтайн, Хальмагай хатаршад түлөөлөө. Тиихэдэ Монгол оронһоо Сэрэгэй дуу, бүжэгэй шуулган, мүн Хитад гүрэнэй можо, оронуудай зохёохы бүлгэмүүд суглараа.

Буряад арадайнгаа соёл ура­лиг алад холуур танилсуулан дэлгэрүүлжэ ябадаг «Байгал» те­атр тус ехэ нааданда түрүүшынхиеэ хабаадаба гэжэ тэмдэглэлтэй. 200 гаран зохёохы бүлгэмүүдэй дурадхаһан хатар бүжэгүүдэй 11- иинь лэ түгэсхэлэй шатада га­раа, тиигэжэ «Байгал» театрай харуулһан бүхы гурбан хатар гурбу­улаа эрхимүүдэй тоодо орожо, эсэ­сэй тоглолтодо гүйсэдхэгдэхэһөө гадна, 2 алтан, 2 мүнгэн шанда хүртөө бшуу. Ородой Холбоото Ула­сай уралигай габьяата ажал ябуу­лагша Дандар Бадлуевай найруу­лан табиһан «Хори буряадай ёохор» «Байгал» театрай абьяас түгэлдэр бүжэгшэдэй гүйсэдхэлгөөр тус ехэ нааданай ёһотой шэмэг боложо, эрхим хатар гэжэ нэрлэгдээ. Гад­на «Хун шубууд», «Шаастын зугаа» гэһэн бүжэг нааданууд түрүү зэргэ­дэ дурдагдаа.

«Шагнал абажа байхада, урма­тайл ааб даа. Теэд монгол туургата­найнгаа дүхэригтэ орожо, дүтөөр та­нилсаха, бэе бэеынгээ дүршэл халан абаха гээшэ манда эгээл шухала», - гээд, «Байгал» театрай хатаршан, Бу­ряад Уласай арадай зүжэгшэн Даба Дашинорбоев мэдүүлнэ.

"Байгал" театрай Facebook хуудаһанһаа гэрэл зурагууд абтаба