​Хони хайшалгаар шоу үнгэрөө

Үүлтэртэ хони, ямаанай Сибириин болон Алас-Дурнын 13-дахи үзэмжын шугамаар Үбэр-Байгалай хизаарай Кутузовка гэһэн тосхондо нооһо хайшалаашадай ехэ урилдаан үнгэрбэ. Энэ урилдаан мүрысөөнэй шэглэлтэй байгаагүй, зүгөөр мал ажаллагшад эндэ өөрынгөө бэлиг абьяас харуулха аргатай байгаа. Тиимэһээ эндэ хони үсхэбэрилдэг газарнуудһаа эрхим бэрхэшүүл ерэжэ, ёһотойл нооһо хайшалгын шоу-харалган үнгэрөө гэлтэй.

Гурба минута гурбан секундын туршада бүхэли хониной нооһо хайшалжа, ёһотой бэлиг шадабари манай Буряад ороной Зэдын аймагай Боргойн үүлтэртэ ажахын түлөөлэгшэ Зоригто Галсанов харуулжа, эрхим гэжэ тодороо. Хоёрдохи һууридаТыва Уласһаа нэгэ хүн гараа, харин Үбэр-Байгалай хизаарай Ононой аймагай “Рассвет” гэһэн ажахын Бальжинима Самбуев 3 минута 52 секундын туршада хони хайшалжа, гурбадахи һуури эзэлээ.

Автор: Буряад Уласай Хүдөө ажахын яаманай мэдээсэлэй албанай дурадхаһан фото-зураг
Описание: Илагша Зоригто Галсанов

Бүхыдөө нооһо хайшалагшадай мүрысөөндэ 12 хүн хабаадаа, тэдэнэй хоёрынь эхэнэрнүүд байгаа. Могойтын аймагай “Гэрэл” гэһэн ажахые түлөөлэгшэ Шойжид Тумурова дүрбэн минута 24 секундын туршада хони хайшалжа, һайн дүн харуулаа.

Сибириин болон Алас-Дурнын 13-дахи үзэмжын хэмжээндэ Орос Уласай 6 газар: Хакаси, Тыва, Буряад орон, Алтай, Алтайн болон Үбэр-Байгалай хизаарһаа гээд, хамта дээрээ 35 ажахы хабаадаа. Тэдэнэр бүхыдөө хониной 11 үүлтэрэй болон ямаанай хоёр үүлтэрэй янза энэ үзэмжэдэ дэлгээд, бүрин хамта 300-гаад толгой хони, ямаан асарагдаа болоно.

Буряад Уласые энэ ехэ үзэмжэдэ табан ажахынууд түлөөлөө. Хэд бэ гэхэдэ, “Юрөө”, “Боргойский”, “Баянгол”, “Шэбэртэ”, “Буряад хонин” гэһэн ажахынууд мүн. Буряад оронһоо 39 хүн энэ үзэмжэдэ ошоо, ажахын түлөөлэгшэд, үзэмжын гэшүүд, экспертнэ шалгалтын гэшүүд оролсоно.

Манай Буряад орониие түлөөлэгшэд нарин нооһото үүлтэрэй Үбэр-Байгалай үүлтэрэй буряад түхэлэй хони “Юрөө”, “Боргой” гэһэн хоёр ажахы дэлгээ. Бүдүүн нооһото, мяханай үүлтэрэй Буряадай үндэһэн “Бүүбэй” хониной үүлтэр “Баянгол”, “Шэбэртэ” гэһэн ажахы абаашаа. Мүн Буряадай бүдүүн нооһото хониной үүлтэр баһал үзэмжэдэ абаашагдаа.

Сибириин болон Алас-Дурнын 13-дахи үзэмжэ дүрбэн үдэрэй туршада ажаллажа, дүнгүүдые согсолоо. Тэрэнэй дүнгөөр Хориин аймагай “Баянгол” ажахы гурбадахи шатын дипломоор тэмдэглүүлэгдээ.

Үүлтэртэ хони үсхэбэрилгэдэ өөһэдынгөө хубитаяа оруулалсаһанай түлөө гээд, Хүндэлэлэй грамотануудаар Галина Телешева, Зэдын аймагай “Племзавод Боргойский” ажахын ахалагша хонишон, Дамдин–Доржи Мансорунов, Зэдын аймагай “Племзавод Боргойский” ажахын ахамад зоотехник, Арсалан Бадмаев, Сэлэнгын аймагай “Юрөө” ажахын малай аргашан, Татьяна Степанова, Сэлэнгын аймагай “Юрөө” ажахын ахалагша хонишон, Цырена Доржиева, Яруунын аймагай “Үльдэргэ” ажахын малшан, Эльвира Цырендылыкова, Яруунын аймагай “Үльдэргэ” ажахын ахамад зоотехник, Зорикто Намдаков, Хориин аймагай “Баянгол” ажахын ахалагша хонишон, Аян Намдаков, Хориин аймагай “Баянгол” ажахын ахалагша хонишон, Баир Цыренов, Бэшүүрэй аймагай “Шэбэртэ” ажахын ахалагша хонишон, Александр Бадмаев, Бэшүүрэй аймагай “Шэбэртэ” ажахын ахалагша хонишон гээд, шагнуулагдаа.