1201
Буряад Уласай Хэжэнгын аймагай Хэжэнгэ һуурин олзын хэрэг эрхилхэдээ шадамар зоноороо холо, ойгуур суутай. Хэды тиимэшье һаань, мүнгэнэй хямаралай хатуу шэрүүн сагай байбашье, иимэ ажал шэнээр эрхилхэ зүрхэтэйшүүл олдоод лэ байна. Энэ дугаартаа эгээл иимэ зүрхэтэй эхэнэр Марина Владимировна Аздаева тухай хөөрэхэмни.
Буузын түрэлэй бэлдэбэри хоол бүтээдэг цех Хэжэнгэ һууринай алдар солотой Ленинзам гэжэ хороололдо оршоно. Һая хада мүнөө байгааша цехэй һуурида хуушанай РЭС-эй һалаһан һандархай, сонхонуудай орондо хара хүндытэй жара жалжагар байшангууд байдаг бэлэй. Марина Владимировна Аздаева тус байшангуудые гартаа оруулхатаяа адли, һэльбэн шэнэлжэ, үдэр ерэхэ тума уруугаа орожо байһан гэрнүүдые өөдэнь татан заһажа, татаһан мяхаар бүтээдэг эдеэ хэдэг цех байгуулба.
- Бидэ энэ хүдэлмэриеэ һаял эхилжэ байна гээшэбди. Жэлшье болоогүйбди, - гэжэ Марина Владимировнагай ородоор хөөрэһэнииень буряадшалмаар: - Үйлэдбэримнай балайшье ехэ бэшэл даа. Тиимэһээ мүнөө гансал Хэжэнгэдээ улаан гараараа бүтээһэн бэлдэбэри хоолоо наймаалнабди. Хэжэнгэ дээрээ өөрын мэдэхэ 2 дэлгүүртэйбди. Ябан, ошон манай эдеэн Буряадай дэлгүүрнүүдтэ гарана бэзэ.
Иигэжэ хөөрэхэ зуураа Марина Владимировна бэлдэбэри хоол бүтээхэ гээшэмнай тиимэшье бэлэн хэрэг бэшэ байшаба гээд, сэхыень хэлэнэ:
- Һанаад үзэхэдэ, татаһан мяха талханда орёоходо, юуниинь хүндэ юм гэжэ һанахаар ха юм даа. Үнэн дээрээ иимэ хүдэлмэри хэжэ байхадашни, ажалынь шашаг. Халуунай сагта мяхаа хүргөөжэ хадагладаг газарһаа эхилээд, али тэды онсолигууд үзэгдөөд лэ байна.
Марина Аздаевагай цехтэ мүнөө 5 хүн хүдэлнэ. Тэдэнэй мушхаһан бууза хэжэнгээрхин гэмгүй худалдан абана. Дэлгүүрнүүдтэнь юрэ наймаан һайн ябадаг. Гэбэшье, нэгэнһээнь абаад, нүгөөдэдэнь худалдажа байһанда орходоо, улаан гараараа хэһэн бэлдэбэри хоол наймаалхада, һураггүй ашагтай байна.
Хэжэнгээрхин энэ цехтэ мяхаа асаржа тушаадаг байна.
Автор: Баяр Жигмитов
Описание: Анхандаа эндэ эгээл иимэ һара һандигар байшан байдаг һэн
Автор: Баяр Жигмитов
Описание: Мүнөө байгааша цех газаа талаһаань
Автор: Баяр Жигмитов
