​Һүнэй хаһа эхилэнхэй

Буряад Уласай Хүдөө ажахын яаманай сайдай уялга дүүргэгшэ Пётр Брыков эдэ үдэрнүүдтэ Сэлэнгын, Ивалгын аймагуудаар ажалай хэрэгээр ябаһан байна. Буряад орон дотороо мэдээжэ болоһон “Берилл” гэһэн ажахы ерэжэ, грантын дэмжэлтэдэ хүртэгшэ хүдөө ажахын кооперативуудай бэелүүлһэн ажал шалгаба.

Мүнөөдэрэй байдалаар, “Берилл” эмхи ажалай нэгэ хаһын туршада 7 тонно һү буйлуулжа, һайн шанарай һүнэй 15 зүйл үйлэдбэрилнэ. Зөөхэй, ааруул, тараг, элдэб жэмэсэй холисотой йогуртнууд гээд, элдэб эдеэнэй зүйлнүүд бодото һүнһөө гарана. Үйлэдбэрилэгдэһэн зүйлнүүдээ өөһэдынгөө наймаанай газарнуудта худалдана, мүн Сэлэнгын аймагай, Улаан-Үдын болон Эрхүүгэй можын худалдаа наймаанда дэлгэгдэнэ. Болбосоруулагдаха һүн таряашадай-фермерскэ ажахынуудһаа болон үмсын хамһабариин газарнуудһаа тушаагдан абтагдана. Кабанскын аймагай “Рубин” гэһэн ажахы эдээндэ һү тушаана.

Ивалгын аймагай “Возрождение” гэһэн хүдөө ажахын потребкооператив хүгжэлтын грантын дэмжэлтэдэ хүртөө. Тэрэ мүнгэн зөөреэр һү шэрэдэг машина, һү хүргэдэг хэрэгсэл, ааруул, сыр бүтээдэг түхеэрэлгэнүүдые худалдажа абаа. Тус кооператив Ивалгын аймагай үмсын ажахынуудһаа һү тушаажа абаад, “Буряадай һүн” гэһэн ажахы руу асаржа, буйлуулгада тушаадаг. Үмсын зонһоо хүдөө ажахын эдеэнэй зүйл тушаажа абалгаяа дээшэлүүлхэдээ, ажаһуугшадай олзо орошо бии болгожо, һү тушаан абалга хүгжөөжэ, һайн шанартай, бэедэ хорогүй эдеэнэй зүйл найдамтай болгоно бшуу.