1102
"Агротопводстрой” гэһэн газар уһалха, намагтай газар хатаажа, газарай хүрьһэ һайжаруулха ажал ябуулдаг эмхи мүнөө үеын тон һүүлшын эрдэм ухаанай бүтээл болохо уһалууриин түхеэрэлгэ худалдажа абаба. Энэ түхеэрэлгэнь хадаа 360 гектар талмайда таригдаһан ургамалнуудые нэгэ доро ябажа уһалха үргэн арга боломжотой. Иимэ машина 120 гектар талмай уһалха аргатай. 500 метр үргэн, секундын туршада 80 литр уһа гаргашалдаг байна.
Мухар-Шэбэрэй болон Ивалгын аймагуудаар ажалай хэрэгээр ябахадаа, Буряад Уласай хүдөө ажахын орлогшо сайд Петр Брыков энэ түхеэрэлгэ тухай мэдээсээ.
- Энэ түхеэрэлгэ 42 миллион түхэригэй үнэ сэнтэй, хахадыень Буряад Уласай Хүдөө ажахын яаманай тэдхэмжээр түлэгдэбэ. “RKD” гэһэн Испаниин эмхидэ бүтээгдэһэн энэ түхеэрэлгэ уһа алмажа, экономикын талаар бариишатай юм,- гэжэ орлогшо сайд мэдээсээ.
Гэхэ зуура, энэ техникэ хадаа уһа эршэ багатай хэрэглэжэ, зайн галай элшэ хүсэ алмана. Зайн галай болон дизельнэ тоһо түлишын элшээр хангагдаха аргатай, уһанай ханааб сооһоо соргоор дамжуулхадаа, элшэ абаха баһал боломжотой хадаа хэрэглэлгэдэ угаа таарамжатай юм байна. Үдэрэй туршада 10 часай хугасаада тогтонгүй ажаллаха аргатай хаш.
Энэ уһалалгын түхеэрэлгэ эндэ һаяшаг тодхогдобошье, үрэ дүн үгэжэ эхилэнхэй. Уһалуулагдан сасуу газарай хүрьһэн 3 сантиметр болотор нэбтэрээд, нэгэ хэды часай хугасаада доошоо 10-аад сантиметр нороно. Иигэжэ гүнзэгыгөөр хүрьһэ руу ороһон уһан хэдышье халуун уларилай болоходонь, газарай хүрьһэнэй шииг алдагдангүй, ургаса һайнаар ургаха бшуу.
Энээндэ орходоо үнэ сэнгээрээ хямдашаг түхеэрэлгэнүүд тухай хэлэбэл, “Түгнэ” ажахы “барабан” мэтээр эрьелдэдэг уһалалгын машина худалдажа абаа. Тиимэ түхеэрэлгэ хүдөө ажахын эмхинүүд булта хэрэглэхэ арга боломжотой.
- Эдэ хэрэгсэлнүүд 500 метр ута зайда татагдажа, түргэн тодхогдодог, үнэ сэнгыншье ехэ бэшэ. Ехэ гарашагүйгөөр хэрэглэгдэдэг, эндэ насос болон уһан лэ хэрэгтэй бшуу, -гэжэ Петр Брыков онсолбо.
Байгша ондо Буряад Уласай “Газар”, “Агролидер Плюс” болон “Фаворит” гурбан ажахы хартаабха болон овощ ургуулха 404 гектар талмай дээрэ дуһал дуһалаар уһалдаг түхеэрэлгэнүүдые өөһэдынгөө газар дээрэ нэбтэрүүлэн үргэлжэлүүлхэ.
“Здоровое питание”, “Гарантия-2” болон “Газар” гэһэн гурбан ажахы 194 гектар газарай дэбисхэртэ хүрьһэ һайжаруулгын ажал ябуулха. Мухар-Шэбэрэй аймагай “Здоровое питание” гэһэн ажахы Сухариин гүрэнэй уһажуулгын дэбисхэр дээрэ эрьюулдэг түхеэрэлгэ 110 гектар талмайда, Прибайкалиин аймагай “Гарантия-2” гэһэн эмхи Таловскын ажахын хоорондохи уһалалгын 45 гектар талмайда эрьелдүүлэн тойроод уһалдаг хэрэгсэл, Ивалгын аймагай “Газар” ажахы Дундаевска гүрэнэй уһажуулгын түхеэрэлгэ 39 гектар талмайда хэрэглэхэ юм.
Таряалан болон бүдүүн тэжээлэй ургамалнуудые уһалуулха түхеэрэлгэ болон техникэ худалдажа абаһан ажахынуудта гаргашалһан мүнгэн зөөриин 50 процентнь Буряад Уласай һангай мүнгэн зөөриһөө бусаагдаха. Энэ дэмжэлтэ Хүдөө ажахын яаманай ажал ябуулгаар хараалагданхай. Бүхыдөө энэ хэрэгтэ Буряад Уласай мүнгэн зөөриин жасаһаа 19 миллион түхэриг һомологдонхой.
Автор: Цырегма САМПИЛОВА
Описание: Шэнэ түхеэрэлгэ газар уһална
Автор: Цырегма САМПИЛОВА
