​Боргойн хониной мяханай алдар һэргээгдэнэ

Хүдөө нютагта ажаһуудаг арад зон мяха, һүөө тушааха арга боломжогүй байна гээд һайнаар мэдэнэбди. Харин худалдабал, тэдэ тон бага мүнгэ олзоборилно гээшэ. Зэдын аймагай ажаһуугшад мяхаяа худалдаха хэдэн аргатай юм. Зэдэ тосхондо бууза, пельмен наймаалдаг өөрын олзын хэрэг эрхилэгшэ Лариса Найданова арад зонһоо мяха үндэр сэнтэйгээр худалдан абана. Тиимэһээ хүнүүд мяхаяа оруулха ээлжээндэ оролсоно.

Зэдэ тосхонһоо Россиин сэрэгшэдэй нүүжэ ошохын урдахана Лариса Найданова багахан үйлэдбэри зохёожо, пельмен, бууза наймаалжа эхилээ. Эгээл тэрэ хүндэ сагта хэдэн хүн зон ажалтай болоо.

- Манай үйлэдбэри нэн түрүүн арад зонһоо оройдоол дүрбэн тонно хүрэтэр мяха худалдан абажа эхилээ. Харин мүнөө 10 гаран тонно абанабди. Зарубино, Ёнхор, Дэрэстэ, Цагаатай болон бусад нютагуудай ажаһуугшад маанадтай нягта харилсаатайгаар хүдэлнэ, - гэжэ үйлэдбэриин технолог Олеся Козачихина хөөрэнэ.

Һүүлэй байдалаар, “Джида” гэһэн үйлэдбэри өөрын эдеэ хоол республикын зургаан аймагта болон Улаан-Үдэ хотодо наймаална. Бууза, пельмен, котлетэ, тефтели болон бусад амтатай эдеэ хоол дурадхагдана.

Нэгэ сүүдхэ соо 350-400 килограмм шахуу хоол хэгдэнэ. Бүхы эдеэн соо химиин нэмэлтэнүүд оруулагданагүй, ганса экологическа сэбэр мяхан хэрэглэгдэнэ гээшэ.

Мяхатай зүйлнүүдһээ гадна хилээмэнэй зүйл эндэ бүтээгдэжэ эхилээ. Ушар гэхэдэ, Лариса Найданова һаяхана хилээмэ бариха пеэшэ худалдажа абаа.

- Бидэ мүнөө хилээмэнэй зүйлнүүдые наймаалжа эхилээбди. Түсэб соомнай эбэртэ мал гаргаха цех бариха зорилго нэн түрүүн табигданхай. Удаань колбасагай зүйлнүүдые бүтээхэ цех һанаанда байна, - гээд Олеся Козачихина түсэбөөрөө хубаалдана.

Үшөө тиихэдэ Боргойн хониной мяханай алдар соло һэргээхэ ажал тус үйлэдбэри ябуулна. Һүүлэй хэдэн һара соо эндэ хониной мяханай зүйлнүүд худалдаанда табигдана. Хониной мяханһаа гадна хошхоног, орёомог, шуһа болон бусад зүйл хүн зон дуратайгаар абана.

Һүүлэй мэдээгээр, тус үйлэдбэридэ 20 хүн хүдэлжэ байдаг.