​Амтатай загаһанай зүйлнүүд Кабанскын аймагта буйлуулагдана

Манай нютагай хүн зон загаһанай эдеэ хоолдо дуратай байһыень үнинэй мэдээжэ. Теэд шэнжэ һайтай загаһанай зүйлнүүд хомор. Тиимэһээ Кабанскын аймагай ИП “Швырков” арад зонойнгоо магтаалда хүртэмэ эдеэ хоол наймаална.

2006 ондо олзын хэрэг эрхилэгшэ Андрей Швырков Тресково һууринда загаһа буйлуулгын цех барижа эхилээ. Тэрэнь оройдоол зургаан жэл боложо, ашаглалда тушаагдаа. Ушар гэхэдэ, хиналтын албанууд нягтаар тус ажалые шалгаһан байна. “Энээнһээ уламжалан, манай үйлэдбэри шанга эрилтэнүүдые гаража шадаа. Мүнөө сагта хүдэлхэдэмнай, амар байна”, - гээд ИП “Швырков” үйлэдбэриин мүнгэнэй талаар хүтэлбэрилэгшэ Наталья Конева хөөрэнэ.

Улаан загаһан Эрхүү болон Улаан-Үдэ хотонуудһаа худалдан абтагдана. Үйлэдбэриин ехэнхи зүйл хадаа омоли загаһанһаа бүридэнэ гээшэ. Тус ажахы загаһа дабһалаад, борсолоод, сонгоогоод наймаална. Үшөө тиихэдэ эндэ загаһанай мяхаар бууза, котлетэ хэгдэнэ. “Эндэхи загаһанай беляш, чебурек эдихэдэ һонирхолтой даа”, -гээд олон хүнүүд гайхан хэлсэнэ.

Мүнөөнэй үедэ ажахы 150 гаран нэрэтэй зүйл худалдана. 2015 ондо 77 тонно загаһанай эдеэ хоол худалдагдаһан юм. Харин 2016 оной түрүүшын хахад жэлдэ энэ тоо нэгэ бага доошолонхой – 28 тонно болоо. Шалтагаан хадаа мэдээжэ – дэлхэй дээрэхи экономическа хямарал.

Иимэ хүндэ байдалда ороод байхадаа, гүрэнэй тэдхэмжэгүй хүдэлжэ шадахагүй байгаабди. Үшөө 2014 ондо манай ажахы гүрэнһөө мүнгэ абаа бэлэй, - гээд Наталья Конева хөөрөөгөө үргэлжэлүүлнэ.

Наймаанай бага болоһоной үшөө нэгэ шалтагаан гэхэдэ, зайн галай сэн болоно гээшэ. Эрхүүгэй можотой Буряад Уласые зэргэсүүлбэл, манай республикада зайн галай түлбэри хоёр-гурба дахин ехэ бшуу. Энэ ушар загаһанай зүйлэй сэн дээшэлүүлнэ.

Һүүлэй үедэ омоли загаһан үгы болохоор тухайлагдана. Тиимэһээ тэрээниие олзоборилхые хорихо ажал ябуулагдана. Энэ байдал хэды хүндэшье һаа, ИП “Швырков” ажахынхидай һанаа зобооногүй. “Омоли загаһа олон жэл соо бариһан байнабди. Харин мүнөө хорилго хэжэ, омолиин тоо олон болгохо түсэб табигдана. Бидэ бүхыгөөрөө энээниие дэмжэнэбди. Омоли загаһанай түлөө ондоо загаһа үйлэдбэридөө хэрэглэхэбди”, - гээд Наталья Конева мэдүүлнэ.