​Хүдөө ажахын яармаг нээгдэхэ

Буряад Уласай хүдөө ажахын болон эдеэ хоолой яаман Улаан-Үдэ хотын захиргаантай суг хамта “Ургаса” гэһэн ээлжээтэ эдеэнэй яармаг үнгэргэхэнь.

Эндэ эдеэ хоолой зүйлнүүдые үйлэдбэриин, буйлуулгын эмхинүүд, потребкооперацинууд, саад ургуулагшадай нүхэсэлнүүд, үмсын хамһабариин ажахынууд мүнөө жэлэй шэнэ ургаса наймаанда табиха. Хотын ажаһуугшад августын 20-ной үдэр гурбан талмайнуудта: “Түбэй дэлгүүр”, “Стимул” дэлгүүр болон “Фортуна” гэһэн наймаанай түбтэ огородой эдеэ, сэсэгүүдые, жэмэсүүдые, хүдөөгэй амтан ургамалнуудые, зүгын бал, һүнэй, мяханай зүйлнүүдые болон байгаалиин хэшэг эдеэнэй зүйлнүүдые худалдажа абаха аргатай.

Заншалта ёһоороо яармагай үедэ Улаан-Үдын зохёохы ажалай эмхинүүд наадаяа дэлгэхэ, огородой эдеэ хайшан гээд буйлуулхаб гэһэн дүршэлтэ хэшээлнүүд харуулагдаха. Үхибүүдэй зураһан “Фруктово- ягодная корзинка” гэһэн уран зурагуудай харалганай дүн согсологдохо.

Бүхыдөө энэ яармагта хүдөө ажахын эдеэ хоол ургуулдаг, үйлэдбэрилдэг, буйлуулдаг 30 гаран эмхинүүд хабаадахаар хараалагдана.