​Дээдэ-Үдын яармаг урина

Сентябриин 3-най үдэр Буряад Уласай Хүдөө ажахын яаман Улаан-Үдэ хотын захиргаантай суг хамта “Дээдэ- Үдын яармаг” үнгэргэхэнь.

Энэ хэмжээ ябуулга Улаан-Үдэ хотын 350 жэлэйнь ойн баярта зорюулагдана. Заншалта брифинг дээрэ Хүдөө ажахын яаманай эдеэ хоолой дэлгүүр болон дотоодын харилсаа хүгжөөлгын таһагай дарга Дамдин Намсараевай тэмдэглэһээр, энэ хэмжээ ябуулга хадаа хүдөө ажахын эдеэ хоол үйлэдбэрилэгшэдые дэмжэхэ үүргэтэй юм.

- Эндэ хүдөөгэй эдеэ хоол үйлэдбэрилэгшэд буйлуулһан, үйлэдбэрилһэн эдеэ хоолой зүйлнүүдээ наймаалха талмайтай болоно, хүн зон сэхэ үйлэдбэрилэгшэдһөө хямдаар эдеэ хоол худалдажа абаха аргатай болоно, - гэжэ тэрэ онсолбо.

Энэ удаа яармагта хүдөөгэй фермернүүд, эдеэ хоол үйлэдбэрилэгшэ эмхинүүд, талхаар амтан эдеэ болгодог, кондитерскэ болон мяханай үйлэдбэриинхид хабаадаха.

Гол үйлэ гэхэдэ, яармагта хабаадагшад хониной мяхаар, дотороор буйлуулһан эдеэ хоол амталжа үзэхэ аргатай. Эндэ Зэдын аймагай Т.Д. Дамчеевэй үмсын эмхи болон Ивалгын аймагай “Агрохолдинг” гэһэн эмхи хониной мяхан эдеэн табаг дэлгэхэ.

- Хониной мяхан гээшэ бусад мяханһаа онсо амтатай эдеэн гээшэ. Ариг сэбэр, бэедэ хорогүй энэ мяхан тон амтатай, аша туһатай зүйл гээшэ. Минеральна холисонуудаар элбэг болон холестерин багатай эдеэн гээшэ, - гэжэ Дамдин Батожаргалович тэмдэглээ.

Дэлгүүр дээрэ хониной мяхаар хэһэн орёомог, шуһанай, эльгэнэй колбаса, хиимэ болон бусад хониной дотороор буйлуулһан буряад арадай заншалта эдеэн дурадхагдаха.

Манай Буряад орон дотор 350 мянгаад толгой хонин үсхэбэрилэгдэдэг. Энэ тоо баримта үшөөшье дээшэлүүлжэ, хүгжөөхөөр, зүгөөр, манай Буряад орон дотор, Улаан-Үдэ хотын ажаһуугшад хониной мяха багаар хэрэглэдэг байһыень Дамдин Намсараев баһал тэмдэглээ. Гэхэ зуура, хониной мяхан үхэрэй, гахайн мяханһаа үнэ сэнтэйгээр худалдагдадаг юм.

Яармаг сентябриин 3-да Улаан-Үдэ хотын Революциин талмай дээрэ үдэрэй 11 сагһаа эхилхэ. Яармаг нээлгэнэй баяр ёһолол үдэрэй 15 сагһаа эхилхэ.