​Огородой эдеэн - үнэмшэлгөөр

Буряад Уласай Хүдөө ажахын болон эдеэ хоолой яаман 2015 онһоо эхилжэ, “Эдеэ хоолой үнэмшэлгэ-сертификат” гэһэн хэмжээ ябуулга эхилжэ, хоёрдохи жэлээ амжалтатай ябуулна.

Энэ проект Буряад Уласай Засагай газарай дэмжэлтээр хүдөө ажахын эдеэ хоол үйлэдбэрилэгшэдые дэмжэхэ болон ажаһуугшадые нютагтаа үйлэдбэрилэгдэһэн һайн шанартай эдеэ хоолоор хангаха зорилго табигдаа.

Улаан-Үдэ хотын ажаһуугшад хэлсээ баталжа, 2,5 мянган түхэригэй үнэ сэнтэй “Эдеэ хоолой үнэмшэлгэ” абана. Тэрэ мүнгэеэ уридшалан хүдөөгэй эдеэ хоол буйлуулагшадта түлөөд, ургаса хуряалганай хаһада 90 кг хартаабха,10 кг морхооб, свекло г.м. ургаса гэртээ буулгуулха аргатай.

Хүдөө ажахын яаманай хүдөөгэй дэлгүүр хүгжөөлгын болон инвестициин таһагай дарга Дамдин Намсараевай хэлэһээр, хүн зон өөрынгөө дураар огородой ургаса шэлэн абаха аргатай.

- Энэ үнэмшэлгөөр абтагдаха огородой эдеэн нэгэ килограммынь 17 түхэригэй болоно. Хэлсээн апрелиин 1-һээ майн һүүл болотор баталагдана. Харин эдеэнэй ургаса сентябриин 15-һаа декабриин 31 болотор асарагдаха, - гэжэ Дамдин Батожаргалович мэдээсэбэ.

Энэ эдеэ хоолой үнэмшэлгэ хэлсээ баталагшадта алишье талаһаань аша туһатай гэжэ тэмдэглэлтэй. Арад зон үнэ сэнгүйгөөр һайн шанартай ургаса гэрэйнгээ газааһаа абана. Мүн хүдөө ажахынхидта уридшалан мүнгэеэ түлэхэдэнь, туһа болоно, юуб гэхэдэ, хабарай ажалнуудые тэрэ мүнгэн зөөреэр ядамаргүй үнгэргэхэ арга олгогдоно. Энэнь хадаа банкнуудһаа урьһаламжын мүнгэн зөөри ехэ нэмэлтэтэйгээр абаха шэнги бэшэ, харин юрэ урьһаар абагдаһан зөөри ехэ туһа хүргэнэ бшуу.

Мүн лэ зүгын бал худалдажа абаха үнэмшэлгэ байгуулагданхай. 3 литр зүгын тоһон 1300 түхэригөөр худалдана. Энэнь бал үйлэдбэрилэгшэдтэ баһал аша туһатай болоно.

Энэ үнэмшэлгэнүүдые тараалга хадаа хари гүрэнһөө эдеэ хоолые манай гүрэн дотор оруулхагүй, һайн шанартай өөртөө үйлэдбэрилэгдэһэн эдеэнэй зүйл гаргагшадые дэмжэлгын шугамаар бэелүүлэгдэнэ.

Нёдондо энэ хэмжээндэ хабаадагша КФХ “Вихрев”, “Газар” гэһэн ажахынууд хэлсээгээ саг соонь бэелүүлжэ шадаад, үрэ дүнтэй байһыень мэдэржэ, мүнөө жэл дахин хабаадажа байна.

Буряад Уласай Хүдөө ажахын яаман энэ хэмжээ ябуулгаяа саашань үргэлжэлүүлжэ, улам хүгжөөжэ, огородой эдеэ ургуулга өөдэнь бодхоохо хүсэлтэй.