​Ерэхэ 2017 ондо эжын капиталай мүнгэн дээшэлүүлэгдэхэгүй

Россин финансын яаманай дурадхалаар, иимэ шиидхэбэри абтаа юм байна. ТАСС агенствын мэдээсэhээр, ерэхэ болон 2019 он хүрэтэр гүрэнэй бюджетнэ политикын гол шэглэлнүүд тухай проект дотор оруулаатай данса соо эжын капитал индексацида оруулагдахагүй гээд тодорхойлогдоо. Тиигэжэ хоердохи болон удаадахи хүүгэдтэй болоhон гэр бүлэнүүдтэ мүнѳѳ үгтэжэ байгаа 453 мянга 26 түхэригэй сертификадууд 2017 ондошье тараагдаха гэжэ лаблая. Россин ажалай болон социальна хамгаалгын сайд Максим Топилин энэ мэдээсэлые мүн лэ зүбшѳѳ. «РИА Новости» гэhэн мэдээсэлэй албанда дуулгахадаа, тэрэ иимэ шиидхэбэри тодо абтаа гээд тэмдэглээ. Урид Максим Топилин эжын капиталые болюулха дурадхалые огто буруушаагаа hэн, мүн ганса ядаруу бүлэнүүдтэ үгэжэшье байхые дэмжээгүй бэлэй гээд хэлэлтэй.