​Ивалгын аймагта һү буйлуулдаг шэнэ цех ашаглалгада мүнөөдэр тушаагдаба

«2015-2017 онуудта Буряад уласта хүдөө ажахын кооперации хүгжөөхэ тухай» программын еһоор гүрэнэй туһаламжада хүртэһэн «Возрождение» гэһэн хүдөө ажахын эд хэрэглэлгын кооператив һү буйлуулдаг цех баряа юм. Буряадай правительствын түрүүлэгшын орлогшо, хүдөө ажахын сайд Даба-Жалсан Чирипов цех нээлгын баяр еһололдо хабаадалсаа. Нэгэ халаанай туршада 400 литр һү буйлуулжа байхаар түсэблэнэ. Ивалгын аймагай фермернүүдһээ, хубиин хамһабариин ажахынуудһаа һү худалдан абажа, буйлуулжа байхаар хараална. Тус кооператив грантын мүнгөөр һү зөөдэг тусхай автомашина, һү хүргэдэг түхеэрэлгэ, мүн технологическа хэрэгтэй бусад түхеэрэлгэнүүдые худалдан абаһан байна. Грантын 3 миллион түхэригһөө гадна өөһэдынгөө 2 миллион түхэриг энэ хэрэгтэ шэглүүлээ. Эндэ бүхыдөө 7 янзын сагаан эдеэ үйлэдбэрилэн гаргажа байха. Жэшээлхэдэ, зөөхэй, һү, йогурт, творог, хайлуулагдаһан сыр, мүн хатуу сыр үйлэдбэрилэгдэхэ байна. Тиин продукцияа Ивалгын аймагта, Улаан-үдэ хотодо наймаанда табиха юм.