979
Ургамалай зүйлнүүдые хадагаламжын газарнууд Буряад Уласта олошоруулагдаха хараатай.
Буряад Уласай хүдөө ажахын болон эдеэ хоолой сайд Даба-Жалсан Чириповай мэдээсэһэнэй ёһоор, мүнөө Ивалга, Мухар-Шэбэр болон Байгал шадарай аймагуудта овощ хадагалха складууд баригданхай. Тэндэ даб дээрээ 30 мянга гаран тонно овощиин зүйлнүүд хадагалагдаха аргатай.
Буряад орондо ажаһуугшадые түхэреэн жэлэй туршада овощиин зүйлнүүдээр дутуугүй хангаха гэбэл, үшөө 30 мянган тонно хадагалха аргатай складууд хэрэгтэй. Энэ талаар хүдэлмэри үргэлжэлүүлэгдэжэ, нютаг дээрээ ургуулһан овощиин зүйлнүүдээр хүн зониие хооллуулха зорилго табигдана.
