​Хүгтэй, хүхюутэй хүдөө ажахын ажалшадай һайндэр

Октябриин һүүл багта Буряад орондомнай хүдөө ажахын ажалшанай габшагай һара эхилһэн байна. Буряад Уласай Хүдөө ажахын болон эдеэ хоолой яаман һайндэртэ зорюулагдаһан бүхы хэмжээ ябуулгануудай гол эмхидхэгшэнь болоо.

Буряад ороной ехэнхи хүдөө нютагуудта мал баридаг, ургамал таридаг ажалшад баярай хэмжээ ябуулгануудта эдэбхитэйгээр хабаадана. Харин дүн гаргаһан удхатай түгэсхэлэй хэмжээ ябуулга Буряадай ниислэл Улаан-Үдэ хотодо эмхидхэгдэнэ гээшэ. Мүнгэ алтанай хэды хомор болобошье, нютагаархидай һүеэ тушааха газарнууд Захаамин, Түнхэн, Ивалга аймагуудта нээгдэбэ. Зонһоо ороһон һүеэ хүдөөгэй олзын хэрэг эрхилэгшэд үдхэн, шэнгэн зөөхэй, хүнэй яһа бэхижүүлхэ, эрэшүүлэй һалай һайжаруулха ээзгэй, садасатай хурса тоһон, нялуун ба гашуун тараг болгоод, хото хүдөөгөөрхиндөө худалданад.

- Мяха шүлэ үнэгүйгөөр наймаалдаг яармагууд олоор эмхидхэгдэнэ. Бэедэ һайн хоол хотодо, хүдөөдэшье хямда сэнгээр наймаалагдана. Буряад Уласай аймаг бүхэн түб һууриндаа Хүдөө ажахын ажалшанай һайндэр үргэн дэлисэтэйгээр эмхидхээ, - гэжэ Буряад Уласай Хүдөө ажахын болон эдеэ хоолой яаманай олондо мэдээсэл тараадаг албанай мэргэжэлтэн Владимир Жапов тайлбарилба.

Ноябриин 23-да Улаан-Үдэ хотодо бүхы Буряад ороной урдаа хараха ажахынуудай мэргэжэлтэд баян гэгшын яармаг Бэеын тамирай байшангай үргэн талмай байна гэжэ дэлгэбэ. Ноябриин 23-да үглөөнэй 10 сагһаа эхилээд, үдэшын 18 саг болотор сагаан эдеэ, адуунай, үхэрэй, хониной, гахайн, шубуунай мяха, загаһа, хилээмэ, шэхэртэй хоол, зүгын тоһо, жэмэс, һамар, һархяаг, ногоон эдеэ, алим болон эдеэнэй бусад зүйлнүүдые тэдэниие ургуулдаг, үдхэдэг эмхинүүдһээ сэхэ худалдан абаха арга боломжоёо Улаан-Үдын ажаһуугшад ба айлшад үрдилдэжэ байгаад хэрэглэбэ.

Автор: Артем Федотов
Описание: Кабанскын аймагай эдеэ хоолой баялиг

Бэеын тамирай байшанай хэды мантан байбашье, хүдөөгэй наймаашад тэрээн соо багтахагүй байба. Мяха наймаалагшадта дулаанай ехэ хэрэггүй һэн тула тэдэнэр газаань зогсожо, «Мяханай жагсаалаар» Улаан-Үдын ажаһуугшадые угтаба. Үүсэдэ хэрэгтэйшүүл мяха бүхэлеэр худалдажа абабад, тоотойхон мүнгэ алтатайшуул үни удаан шэлэжэ, һунгажа, шэгнэжэ байгаад мяха абана. Мяханайнгаа хажууда хирмаса абаһан хүн шүүнэ. Ушар юуб гэхэдэ, дотор гүзээн сула мяханда орходоо, үнэгүй, мүн лэ садасатай байхын хажуугаар ханяаһан хахаһан зондо, илангаяа үхибүүдтэ ушаргүй туһатай юм. Хос-хос гээд лэ, долоон хоногһоо удаан ханяаһан хүндэ ногоон гүзээнэй шүлэ уулгажархихада, ябан-ошон ханяадан хобхордог юм гэжэ хүдөөгөөрхинтэй аманһаа хөөһэ бушхатар наймалалсажа байһан хүнүүд сохом мэдэнэл хаш даа.

Автор: Артем Федотов
Описание: Улаан-Үдын ажаһуугшад үбэлэйнгөө мяха хямдаар худалдажа абаа

Улаан-Үдэдэмнай хүдөөһөө нүүжэ ерэһэн улад олон. Тэдэнэй хүн бүхэн нютагайнгаа һү, мяханда дуратай байнгүй яахаб. Бэшүүр, Зэдэ, Загарай, Захаамин, Ивалга, Кабанск, Хэжэнгэ, Хурамхаан, Хяагта, Сэлэнгэ, Тарбагатай аймагууд ноябриин 23-да гэмгүй худалдаа наймаа эрхилбэ. Дүн хамта хүдөөгэй 60 ажахы яармагта хабаадаа.

Хүдөөһөө ерэһэн мяха Улаан-Үдэдэ буйлуулдаг абарга «Бурятмяспром» шэнэ бүтээлнүүдээ хүдөөгөөрхиндэ амталуулба. «Бурятхлебпром» эмхи Хүдөө ажахын ажалшанай һайндэрэй һүлдэ тэмдэгтэй торт дурадхаа.

Автор: Артем Федотов
Описание: Яармагай үедэ

Хүдөө ажахын ажал эрхилжэ байһан хүндэ мэргэн зүбшэл хододоо хэрэгтэй байдаг. Мүнгэ зээлеэр абабал, хаана үнэгүй байхаб, гүрэн ямар туһаламжа үзүүлнэб, тэрээндэ хүртэхэ гэбэл, ямар данса, үнэмшэлгэ хэрэгтэйб гэхэ мэтын шухала асуудалнууд ажалша малша хүнэй урда тобойн гараад лэ байдаг ха юм. Тиимэһээ «Россельхозбанк», «Шанар шалгадаг Буряадай түб», «Шанар гэршэлһэн баталамжа тараадаг Буряад түб», малай эмнэлгын Улаан-Үдэдэхи һалбари, «Зүүн Сибириин гүрэнэй технологическа университедэй юумэнэй шанар хүтэлбэрилдэг, шэгнүүр, жэн тодоруулдаг эрдэмэй, дүрим гурим нэбтэрүүлгын танхим» гэһэн байгуулгануудта хүдэлдэг мэргэжэлтэд хүдөөгөөрхиндэ хэрэгтэй.

Хүдөө ажахын ажалшанай габшагай һара ноябриин 24-дэ түгэсэбэ. Буряад Уласай Толгойлогшо Вячеслав Наговицын, Буряад Уласай Арадай Хуралай Түрүүлэгшэ Цырен-Даши Доржиев бусад нэрэ хүндэтэн болон үндэр айлшад Г. Цыдынжаповай нэрэмжэтэ Буряадай оперо болон баледэй театрай һаруул ордондо сугларжа, бэе бэеэ амаршалба. Буряадай элитэ дуушад, хатаршадай, зүжэгшэдэй бэлдэһэн тоглолто хараһан байна.

Харин удаадахи үдэртэнь түрүү ажахынуудай мэргэжэлтэд Буряад театрта бэе бэетэеэ золгожо, ажалайнгаа түлэгтэ ушардаг гол бэрхэшээлнүүдээ хэдэн талаһаань зүбшэжэ, хүндүүлхэй бэрхэшээлнүүдтээ харюу олобо.