1047
2017 оной январиин 1-һээ архи, архиин болон тамхинай зүйлнүүдэй акцизай хэмжээн дээшэлүүлэгдэбэ.
Энээн тухай хуулиие Гүрэнэй Дүүмын һунгамалнууд 2016 оной ноябрь һарада баталан абаһан байна. Тодорхойлбол, гадаадын гүрэнэй эдые хэрэглэжэ бүтээгдэһэн нэгэ литр шампанскын акцизай хэмжээн 36 түхэригтэ хүргэгдэбэ. Гэхэтэй хамта, Россида ургуулагдаһан виноград жэмэсээр бүтээгдэһэн нэгэ литр шампанскын акцизай хэмжээн 14 түхэриг болобо. Тэрэшэлэн, гадаадын гүрэнүүдтэ бүтээгдэһэн зөөлэн архиин акцизай хэмжээн 9 түхэригһөө 18 түхэриг хүрэтэр нэмээгдэбэ. Хатуу архиин акцизай хэмжээн 500 түхэригһөө 523 түхэригтэ хүргэгдөө. Тиихэдэ мянган хэһэг сигаретын акцизай хэмжээн 1562 түхэригтэ хүрэбэ. Тамхинай акцизай хэмжээн 2018-2019 онуудта дээшэлүүлэгдэжэ, нэгэ шэрхэг тамхинай сэн дунда зэргээр 20-һоо 35 түхэриг хүрэтэр нэмэхэ болоно.
Дарима ДОНДОКОВА, “Буряад үнэн” мэдээсэлэй агентство
