1113
«Бурятэнерго» бүлгэмэй мэргэжэлтэдэй мэдээсэһээр, хуули бусаар зайн гал хэрэглэгшэдэй тоо үсөөрнэгүй. Тэрэ тоодо Загарай аймагта ажаһуугшадай олонхинь «Бурятэнерго» бүлгэмтэй хэлсээ баталангүйгөөр зайн гал хэрэглэнэ. Үнгэрһэн 2016 ондо иимэ ушарнуудаар дотоодын хэрэгүүдэй албан руу 532 мэдүүлгэ ороhон байна. Тиимэһээ хүн зониие зайн галаар хангадаг эмхиин мэргэжэлтэд саг үргэлжэ шалгалтануудые эмхидхэхэ баатай болоно. «Бурятэнерго» бүлгэмэй директор Андрей Меделяновай хэлэһээр, зайн гал һүнтэй, хилээмэнтэй адли эд бараанай тоодо ороно.
Түлбэригүйгөөр зайн гал хэрэглэгшэдтэй тэмсэл саашадаа улам шанга болохо ёһотой. Нэгэ айл бүлэ һарын туршада дунда зэргээр зайн галай түлөө 200-300 түхэриг түлэнэ. Андрей Меделяновай хэлэһээр, һара бүхэндэ түлэжэ байгаа һаа, зайн галай түлөө үри шэридэ орохогүй. Түлбэриингөө хэмжээ бага болгохо гэбэл, светодиодой лампануудые ашаглажа болоно. Зайн галай хэрэглэгдэһэниие тоолодог оньһон түхеэрэлгые хубилгаха ушарнууд нилээд дэлгэрэнхэй. Гэрэй эзэд саг зуура мүнгэеэ алмабашье, шалгалтын дүнгөөр ехэ хэмжээнэй яла түлэхэ болоно.
Үшөө нэгэ хуули бусын ябадал гэхэдэ, «Бурятэнерго» бүлгэмтэй зайн гал хэрэглэхэ тухай хэлсээ баталаагүй аад, нюусаар зайн гал хэрэглэхэ ушарнууд мүн лэ дэлгэрэнхэй. Хуули хазагайруулһан иимэ арга хүн зоной ами наһанда тон аюултай гэжэ мэргэжэлтэд тэмдэглэнэ. Тобшолон хэлэбэл, зайн галаар хангагшад иимэ ушарнуудые элирүүлхэ зорилготойгоор олоор шалгалтануудые эмхидхэдэг болохонь.
