​Петербургын хэлсээнүүд

Буряад Уласай Толгойлогшын уялгануудые дүүргэгшэ Алексей Цыденов болон Засагай газарай түлөөлэгшэд 2017 оной июниин 1-һээ 3 болотор Санкт-Петербургда 9-дэхиеэ үнгэргэгдэһэн уласхоорондын эдэй хуралдаанда хабаадаба. Энэ хэмжээ ябуулгада Алексей Цыденов Буряад Уласай хүгжэлтэдэ удха шанартай хэлсээнүүдые баталха түсэбтэй. 

Тус хуралдаанай программа Ородой Холбоото Уласай, Европын, Азиин, Америкын Холбоото Штадуудай, Хойто болон Латиин Америкын 200-гаад мэргэжэлтэ шэнжэлэгшэд зохёоһон байна. Энэ хэмжээ ябуулгада 130 гүрэнэй 12 мянганһаа дээшэ зон хабаадаа. Санкт-Петербургын эдэй засагай хуралдаан 1997 ондо түрүүшынхиеэ эмхидхэгдэһэн юм. 2006 онhоо энэ хэмжээ ябуулга Ородой Холбоото Уласай Юрэнхылэгшэ Владимир Путинай хабаадалгатайгаар үнгэргэгдэдэг болоһон. 

Буряад Улас Россельхозбанктай хамта ажалаа ябуулха 

«ПМЭФ-2017» гэһэн хуралдаанай үедэ Буряад Уласай Толгойлогшын уялгануудые дүүргэгшэ Алексей Цыденов болон “Россельхозбанк” гэһэн хуби ниилүүлһэн бүлгэмэй захиргаанай түрүүлэгшэ Дмитрий Патрушев хоёр саашадаа сугтаа ажал ябуулха тухай хэлсэбэ. “Россельхозбанк” Буряад Уласай хүдөө ажахын һалбарида мүнгэ һомололгын түсэлнүүдые бэелүүлхэдэ хабаададаг. Хэлсээнэй ёһоор, гансашье хүдөө ажахы эрхилэгшэдтэй холбоо бариха бэшэ, үшөө тиихэдэ транспортын, гэр байрын хангалгын байгууламжа, аяншалга болон үйлэдбэри хүгжөөхэ талаар түсэлнүүдые бэелүүлгэдэ анхарал хандуулагдаха, тиихэдэ ажаһуугшадта банкын үзүүлдэг туһаламжануудые ойлгосотой, хэрэглэхээр болгохо гэжэ Алексей Цыденов хэлэбэ. 

Үшөө тиихэдэ “Россельхозбанктай» баталагдаһан хэлсээнэй ашаар “Молоко Бурятии” гэһэн хуби ниилүүлһэн нээмэл бүлгэмдэ туһа хүргэгдэжэ, саашадаа тус үйлэдбэри ажалаа ябуулха болоо. 

Ородой Холбоото Уласай IT-компанинууд Улаан-Үдэдэ 

Буряад Уласай Толгойлогшын уялгануудые дүүргэгшэ Алексей Цыденов Ростелекомой вице-президент Артемий Прокопенко гэгшэтэй уулзажа, бюджедэй гадуур мүнгэ һомолжо, шэнэ цифровой хангалгын байгууламжын түсэлнүүдые манай уласта бэелүүлхэ тухай хэлсэбэ. Байгалай мэдээсэлэй ээлжээтэ хуралдаа намартаа Улаан-Үдэдэ үнгэргэхэ тухай хэлсэгдэбэ. 

- 250-һаа дээшэ хүнүүдэй ажаһуудаг, холо оршодог хүдөө нютагуудые, больницануудые хурдан интернедтэй болгохо тухай саашадаа хамтын ажал ябуулха тухай хэлсээбди, – гэжэ Алексей Цыденов хөөрэбэ. 

112 гэһэн утаһаар түргэн туһаламжын албануудта хонходохо, “Аюулгүй хото” гэһэн программа болон уласай харгынуудта ашаа шэгнэхэ арга боломжонууд гэхэ мэтэ асуудалнуудые Алексей Цыденов Артемий Прокопенко хоёр зүбшэн хэлсэбэ. 

“Байкальская гавань” уласай мэдэлдэ оробо 

Ородой Холбоото Уласай Эдэй засагай яаман “Байкальская гавань” гэһэн эдэй засагай онсо газарай хүтэлбэриие Буряад Уласай Засагай газарта даалгаба. Петербургын уласхоорондын эдэй засагай хуралдаанай үедэ Ородой Холбоото Уласай эдэй засагай сайдай орлогшо Александр Цыбульский болон Буряад Уласай Толгойлогшын уялгануудые дүүргэгшэ Алексей Цыденов хоёр хэлсээ баталһан байна. 

Түүхэтэ хэлсээн баталагдажа, Буряад Уласай эдэй засагай хүгжэлтэдэ эхин табигдаба гэжэ Александр Цыбульский хэлэбэ. Энэ хэлсээнэй ёһоор, 10 жэлэй туршада Буряад Уласай Засагай газар “Байкальская гавань” гэһэн эдэй засагай онсо газарай ажал ябуулха юм. Саашадаа хэлсээ баталагшадай дураар энэнь үргэлжэлүүлэгдэжэ болохо. 

Буряад Уласай Засагай газар “Байкальская гавань” гэһэн түсэл бэелүүлгэдэ бүхы эмхи зургаанууд болон олзын хэрэг эрхилэгшэдтэй ажал ябуулха аргатай болобо. Үшөө тиихэдэ эдэй засагай онсо газарта аяншалгын, үйлэдбэриин, техникэ нэбтэрүүлхэ болон спортын ажаябуулга хинагдаха юм. Онсо газарай хилэ элирүүлэгдэжэ, тэндэ ябуулагдаха ажалай болон бүхы шатын бюджедүүдэй мүнгөөр хангалгын байгууламжа бии болгохо гэхэ мэтэ асуудалнуудаар дансанууд бэлдэгдэхэ юм. 

Ород гүрэнэй Эдэй засагай яаманда Буряад Уласай Засагай газар жэл бүри хэһэн ажал тухайгаа тоосожо байха. Тэдэнэй ажалаа муугаар ябуулбалнь, федеральна засаг зургаан бюджедһээ һомологдоһон мүнгэн тэдхэмжэеэ һөөргэнь бусааха аргатай.

- Энэ түсэл хааха тухай шиидхэбэри абаад шахуу байгаабди. Харин шэнэ Толгойлогшын ерэһэнэй удаа “Байкальская гавань” саашадаа хүгжэхэ гэжэ найданабди. Эдэй засагай онсо газар байгуулгада ехэ мүнгэн һомологдоһон юм. Байгал далайн эрьедэ оршодог энэ газарта хангалгын байгууламжа бии, - гэжэ Александр Цыбульский хэлэбэ. 

Алексей Цыденовэй хэлэһэнэй ёһоор, “ Байкальская гавань” гэһэн түсэл анханайнгаа түсэбөөр бэелүүлэгдэжэ, саашадаа үргэдхэгдэхэ юм. Безымянная гэһэн бухта, Горячинск болон Бычья хада шадар хангалгын байгууламжа бариха хэрэгтэ федеральна түбһөө мүнгэ һомолхо тухай асуудал шиидхэгдэнэ. Энэ хэрэгтэ 2022 онһоо хойшо 12 млрд. түхэриг мүнгэн, түрүүлэн хэгдэхэ ажалнуудта 2,9 млрд. түхэриг мүнгэн хэрэгтэй. Эдэй засагай онсо газарай хүгжөөхэ тухай дансануудта һомологдохо мүнгэнэй гаргаша хараалагдаһан юм.

“Байкальская гаваньда” ажал ябуулха тухай 12 компани мэдүүлгэ орууланхай, тэдэнэй хоёрынь лэ эдэбхитэйгээр ажалладаг. Тиимэһээ 2016 оной декабрь һарада энэ түсэл хаагдаха туйлдаа хүрөөд байгаа. Байгша оной март һарада энэ газарые уласай мэдэлэй болгохо талаар ажал эхилһэн юм.

Ой модо үйлэдбэрилгэ 

Петербургда үнгэргэгдэһэн эдэй засагай хуралдаанай үедэ Ородой Холбоото Уласай Ойн ажахын агентствын хүтэлбэрилэгшэ Иван Валентик болон Буряад Уласай Толгойлогшын уялгануудые дүүргэгшэ Алексей Цыденов гэгшэд эршэтэйгээр модо үйлэдбэрилхэ түсэлдэ Буряад Уласые туршалгын талмай болгохо тухай хэлсэбэ.

- Энэ программаар хараалагдаhанай ёhоор, нэгэ газарта олоор ургаһан модо отолходо, түймэрэй аюулгүй байдалда аша туһатай байха, мүн сүлөө газарта модод һайнаар ургаха. Сабшагдаһан залуу модод, эрилтэнүүдтэ харюусаагүй модод ЦКК-да тушаагдаха, - гэжэ Алексей Цыденов хэлэбэ. 

Энэ түсэлдэ хабаадахын тула Ородой Холбоото Уласай ой тайгата аймагуудай бүридэлдэ Буряад Уласые оруулха тухай мэдүүлгэ бэшэгдэхэ болоно. Удаань Ойн ажахын эрдэм-шэнжэлэлгын институт эрдэмэй – полевой ажалнуудые ябуулха юм. 

Монгол гүрэнтэй хэлсээн баталагдаба 

Петербургын уласхоорондын эдэй засагай хуралдаанай үедэ Буряад Уласай Толгойлогшын уялгануудые дүүргэгшэ Алексей Цыденов Монголой премьер-министр Жаргалтулгын Эрдэнэбаттай уулзаһан байна. Гүрэнэй гидроэлектростанци барилгын Байгал далайда ушаруулха хойшолонгуудые шэнжэлхэ бүлэг байгуулха тухай хэлсэгдэжэ байна. Байгаалиин хохидохо хойшолонгууд үгы гэжэ баталагдаа һаань, гидроэлектростанци баригдажа эхилхэ гэжэ Жаргалтулгын Эрдэнэбат хэлэбэ.

- Ган жэлнүүдэй болоһон ушарһаа Байгал далайн уһан бага болоно, тиимэһээ гидроэлектростанциин баригдахада, нуурай экосистемэ муудаха. Манай эрдэмтэд энэ асуудалаар сугтаа шэнжэлгэ хэхээр бэлэн, - гэжэ Буряад Уласай Толгойлогшын уялгануудые дүүргэгшэ тэмдэглэбэ. 

Удаань Алексей Цыденов Жаргалтулгын Эрдэнэбатда энэ станциин орондо Монгол руу газай соргонуудые бариха тухай хэлсэхэ гэжэ дурадхаба. 

- Буряад Уласта газаар хангалга бэелүүлхэ гэхэдэ, тэрэниие хэрэглэлгын тон бага байха ушарһаань соргонуудые татахада ашаг үрэгүй. Тиимэһээ Буряад, Монгол гүрэнүүд энэ асуудалаар нэгэдээ һаа, газаар хангалгын түсэл бэелүүлгэ ашаг үрэтэй байха гэжэ hанагдана, - гэжэ Алексей Цыденов хэлэбэ. 

Монгол гүрэндэ наранай элшын зайн гал хэрэглэлгэ тааруу байна гэжэ тэрэ мүн лэ hанамжалба. Хоёр гүрэнэй түлөөлэгшэд худалдаа наймаа, аяншалга хүгжөөхэ тухай хэлсэбэд. Монголой сайд гүрэнүүдэй хоорондо хүдөө ажахын үйлэдбэриин эдеэ хоолой наймаа үргэдхэхэ тухай хэлэбэ. 

2017 ондо “Хяагта” гэһэн автомашинануудай гарадаг пунктда һэльбэн шэнэдхэлгын ажал дүүрэжэ, тамуужанай алба хаагшадай ажал улам эршэтэй болохо гэжэ Буряад Уласай Толгойлогшо Алексей Цыденов тэмдэглэбэ. Буряад Уласта, Монгол гүрэндэ аяншалагшадай тоо олошоруулха асуудалаар һонирхоһон тухайгаа Алексей Самбуевич хэлэбэ. Мүнөө дээрээ Хитадhаа Монгол ороноор тойроhон Байгал хүрэтэр аяншалгын поезд ябуулха тухай хэлсэгдэжэ байна.

- Хитад гүрэндэ шэнэ поезд зохёогоо, тэрэнь Ород гүрэнэй түмэр харгыда тааруу. Энэ асуудалаар Ородой Холбоото Уласай түмэр харгын толгойлогшо Олег Белоозёровтой хөөрэлдөөб. Монгол гүрэнэй ажаһуугшад энэ поездоор аяншалха аргатай болохо, - гэжэ Буряад Уласай Толгойлогшын уялгануудые дүүргэгшэ Алексей Цыденов хэлэбэ. 

Буряадай Толгойлогшын уялгануудые дүүргэгшэ Алексей Цыденов, Монголой премьер-министр Жаргалтулгын Эрдэнэбат

Жаргалтулгын ЭРДЭНЭБАТЫН Facebook хуудаһанһаа гэрэл зураг