​Нүүдэл заншалаа алдаагүй

Залуу түлэг наһандаа харюусалга даагаад, амжалтатайгаар хүдэлжэ байһан «Үльдэргэ» ажахын захирал Б.Ц.Будажанаевтай хөөрэлдөө эмхидхэбэбди: 

- Булад Цырендоржиевич, танай нютагта малаа нүүлгэжэ манаха урданай заншал алдаагүй гэжэ дуулаа һэм. 

- Тон зүб лэ даа. Үнэхөөрөөшье нүүдэл байдалаа алдаагүйбди. Жэлэй 3 сагта бэлшээриеэ һэлгэн, зуһалан, намаржаан, үбэлжөөндөө зөөнэбди. Ахын болон Үльдэргын малшад нүүдэл байдалтай хадаа адляар бодомжолно гээд Буряадай ехэ эрдэмтэн Цыдып Заятуевич Доржиев ажаглаһан юм.

- Мүнөө «Үльдэргэ» ажахыдаа ямар мал үсхэбэрилнэ гээшэбта? 

- «Үльдэргэ» ажахы үнгэрһэн жэлдэ 85 жэлэйнгээ ойн баярые угтаа. Эды хугасаада үндэһэн мал ажалаа алдаагүй байнабди. Казах эбэртэ бодо мал, «бүүбэй» үүлтэрэй хони, үндэһэн буряад үүлтэрэй адуу үсхэбэрилнэбди. Бүхы малнай үүлтэрэй тусхай гэршэлгэтэй. 

Адуумнай 700 гаран толгой гэжэ тоологдоно. Үндэһэн буряад адуумнай манай байгаалида ехэ тааруу юм. Халуун, хүйтэндэ муудадаггүй, шэрхи амитад. Манай Яруунада зарим үбэлдөө 50 гаран градус хүйтэн болодог гээшэ. 

Yльдэргынхид гүйгөөшэ моридоор ехэ һонирходог юм. Бандида Хамба лама Дамба Аюшеевэй дэмжэлгээр буряад адуу моридой урилдаанда хабаадажа эхилһэндэнь бидэ ехэ баяртайбди. Буряад адуун холын зайда һайнаар гүйдэг. Жэшээнь, монгол морид 25-30 километр зайда урилдана гүб даа. Манай адуу морид тэдээнһээ дутахагүйл байха. 

Тиихэдэ 3 мянга гаран толгой «бүүбэй» үүлтэрэй хонидтойбди. Үнгэрһэн жэлэй намар Ородой Холбоото Уласай яаман үүлтэртэ хониной гэршэлгэ манда барюулаа hэн. Һаяхан Шэтэдэ үнгэрһэн Зүүн Сибириин болон Алас-Дурна зүгэй хони ямаадай үзэсхэлэнһөө аяар табан алтан медальтай бусаабди. 

- Һайн даа. Ажахытнай бүри олон адуу малтай боложо байг лэ!