906
Буряад Уласай Толгойлогшо Алексей Цыденов мүнөөдэр Ярууна аймагта албанай хэрэгээр ябахадаа, «Газпромбанк», Хитад болон Европын олзын хэрэг эрхилэгшэд «Озёрный» комбинадта мүнгэ һомолжо, үйлэдбэри ябуулха талаар һонирхоно гэжэ хэлэбэ.
Ярууна аймагай Иисингэ тосхоной ажаһуугшадтай үсэгэлдэр уулзаха үедөө, энэ үйлэдбэриин ажалаа ябуулжа эхилхын түлөө, 1,5 миллиард доллар хэрэгтэй гэжэ уласай хүтэлбэрилэгшэ хэлэһэн байна.
Мүнөөдэр сурбалжалагшадтай уулзаха үедөө энэ мүнгэн «Озёрный» комбинадай ажалаа ябуулжа эхилхын тула хэрэгтэй. Тиигэбэшье нэгэ доро энэ мүнгэ һомолхо бэшэ, хубаарилан үйлэдбэридэ оруулжа болоно гэжэ Алексей Цыденов тэмдэглэбэ.
«Хари болон манай гүрэнэй компанинууд комбинадай ажалаа ябуулжа эхилхэ хэрэгтэ мүнгэ һомолхоор бэлэн. Тэдэнэй тоодо, «Газпромбанк» - гэжэ уласай хүтэлбэрилэгшэ хэлэбэ.
Ярууна аймагай ажаһуугшадай хэлэһээр, табин жэлэй туршада хэгдэжэ байһан “Озёрный” комбинадһаа боложо, гол горхонууд, нуур хатана гэжэ Иисэнгын ажаһуугшад Буряад Уласай Толгойлогшын уялга дүүргэгшэ Алексей Цыденовтэ хэлэһэн байна.
