1081
Мүнөөдэр, августын 21-дэ, Буряад Уласай Толгойлогшын уялга дүүргэгшэ Алексей Цыденов Ярууна аймагай фермернүүдээр уулзаба. Мал эмнэлгэдэ ехэ мүнгэн гаргашалагдана гэжэ хүдөө ажахы эрхилэгшэд уулзалгын үедэ хэлэһэн байна.
«Бидэ мяха гаргахадаа, аймагайнгаа, удаань дэлгүүрэй малай эмшэдтэ хоёр дахин мүнгэ түлэнэбди. Мал эмшэдэй хүргэдэг туһа хамта 3,9 мянган түхэриг болодог. Эмшэд мал шалгахадаа нэгэ үхэрэй түлөө 157 түхэриг, хониной түлөө 90 түхэриг абадаг. Тиихэдэ һүрэг хонидой хэрэгтэй дансануудтай болохо хэрэгтэ 50 мянган түхэриг гаргашалнабди. Юундэ нэгэ үхэрэй сэн арбан хониной сэнтэй болгохоор бэшэб?» - гэжэ мал үсхбэрилэгшэд хэлэһэн байна.
Буряад Уласай Хүдөө ажахын болон эдеэ хоолой яаманда энэ асуудал бурушааба. Үхэр гү, али хони шалгахадаа малай эмшэн хоёр ондоо ажал ябуулна ха юм, тэрэнэй түлөө түлбэри бага болгохо гээшэ буруу гэжэ Даба-Жалсан Чирипов харюусаба.
Буряад Уласай Толгойлогшын уялга дүүргэгшэ Алексей Цыденов арсалдаашадые таһалжа, уласай фермернүүд энэ асуудалаар нэгэнтэ бэшэ хандаһан байна. Шиидхэбэри абахын урда тээ, һайса тооложо үзэхэ шухала гэжэ хэлэбэ. Тиихэдэ Хүдөө ажахын болон эдеэ хоолой яаман, мал эмнэлгын хүтэлбэриин түлөөлэгшэд болон фермернүүдэй зүблөө үнгэргэхэ тухай уласай хүтэлбэрилэгшэ тэмдэглэбэ.
Буряад Уласай Толгойлогшын уялга дүүргэгшэ Алексей Цыденов албанай хэрэгээр Ярууна аймаг гаранхай гэжэ һануулнабди.
