1035
Буряад Уласта «Россети» бүлгэмэй үдэрнүүд гэһэн хэмжээ ябуулгын үедэ энэ бүлгэмэй захирал Олег Бударгин элшэ хүсэ хэрэглэгшэдтэй болон гэрнүүдые баридаг компанинуудай түлөөлэгшэдтэй зүблөө үнгэргэбэ.
Һая болотор Буряад Уласта элшэ хүсэнэй талаар зүрилдөөтэй асуудалнууд олон байгаа. Һүүлэй үедэ Буряад Уласай Засагай газарта энэ һалбари хүгжөөхэ талаар ажал ябуулагдана гэжэ Олег Бударгин тэмдэглэбэ.
Буряад Уласай Толгойлогшын уялга дүүргэшэ Алексей Цыденовэй хэлэһээр, зайн галай байһан һужаануудые ганса хангаха талаар суг ажалаа ябуулха бэшэ, шэнээр бариха талаар ажаллаха хэрэгтэй.
«Буряад Уласай элшэ хүсэнэй һалбариин хүдэлмэрилэгшэд болон ажаһуугшадай хоорондо харилсаха талаар удаан сагта ажал ябуулнабди. Тиихэдээ хүгжэлтын арга боломжонуудаар хараалдаггүй һэмди, нэгэ аргаар ажалаа хэжэл байгаа һаа гэжэ оролдог байгаабди. Һүүлэй үедэ Буряад Уласай Засагай газарта элшэ хүсэнэй һалбариин байдал тогтонижуулха талаар ехэ ажал хэгдэнэ. Буряад Уласта элшэ хүсэнэй һалбарида шиидхэгдэхэ асуудал олон. Теэд энэ байдал хубилгаха талаар ажал ябуулагдана», - гэжэ «Россети» бүлгэмэй захирал хэлэбэ.
Олег Бударгинай хэлэһээр, улас дотор элшэ хүсэнэй һалбари хүгжөөхэ талаар хэдэн уулзалганууд түсэблэгдэнхэй.
«Элшэ хүсэнэй һалбариин түлөөлэгшэд болон олзын хэрэг эрхилэгшэдэй хоорондоо яажа харилсанаб гэжэ бидэ ойлгохо болонобди. Хоёрдохи уулзалга үйлэдбэрилэгшэдтэй эмхидхэгдэхэ. Эндэ олоһон мүнгэеэ Буряад Уласта үлээхэбди гэжэ найдуулнаб. Гурбадахи уулзалга манай һалбарида хүдэлмэрилэгшэдые бэлдэдэг һургуулинуудай түлөөлэгшэдтэй эмхидхэгдэхэ. Буряад Уласта жэлдээ дүшөөд залуу мэргэжэлтэд элшэ хүсэнэй һалбарида хүдэлхэеэ ерэдэг. Бидэ мүнөө шэнэ оньһоор хүдэлжэ эхилхэбди, цифровой элшэ хүсэн, тиимэһээ хүдэлхэ залуушуул хэрэгтэй», - гэжэ Олег Бударгин хэлэбэ.
Буряад Уласай холо оршодог аймагуудта болон мал ажахын буусануудта таһалгаряагүй зайн гал дамжуулха, тэрэниие хангаха талаар асуудалнуудые шиидхэхээр гэжэ Засагай газар тэмдэглэбэ.
Буряад Уласай Толгойлогшын уялга дүүргэгшэ Алексей Цыденовэй аймагуудаар албанай хэрэгээр ябахада, ажаһуугшад зайн гал таһалдадаг гэжэ хэлэһэн байна. Баргажан аймагай ажаһуугшадай хэлэһээр, «һалхинай багаханааршье үлеэхэдэ, зайн гал унтаршана». Тэрэниие заһабарилха мэргэжэлтэн Баргажан тосхондо ажаһуудаг. Туһаламжын хүрэжэ ерэтэр, хүнүүд удаан сагта харанхыда һуудаг. Уласай хүтэлбэрилэгшэ хэды сагай болзорто зайн гал унтарнаб гэһэн дансануудые бэлдэгты гэжэ хэлэһэн байгаа. Эдэ асуудалнуудаар тэрэ «Россети» бүлгэмэй захиралтай зүбшэн хэлсэхэ тухайгаа мэдүүлээ һэн.
Зайн гал үйлэдбэрилэгшэд, тэрэниие дамжуулдаг хубиин эмхинүүдэй түлөөлэгшэд болон зайн гал ашаглагшадай хоорондохи харилсаан тухай зүблөөндэ хэлсэбэ. Зарим зайн гал дамжуулдаг хубиин эмхинүүд зайн гал үйлэдбэрилэгшэдтэ саг соонь түлбэри түлэдэггүй, тэрээнһээ боложо бултанай шиидхэхэ асуудалнууд гарадаг гэжэ Буряад Уласай үйлэдбэрилэгшэд болон олзын хэрэг эрхилэгшэдэй холбооной гүйсэдхэхы захирал Сергей Соляник тэмдэглэбэ.
Анна Огороднигой гэрэл зурагууд.
