1068
«Метрополь» компанинуудай бүлэг болон Новапорт Холдингын хүтэлбэрилэгшэ, олзын хэрэг эрхилэгшэ Роман Троценко гэшэд хизаарламал харюусалгатай «Аэропорт Байкал» бүлгэм худалдаһан тухай худалдаа-найманай хэлсээ баталба.
«Буряад Уласта шадалтай, энэ һалбарида дүй дүршэлтэй мүнгэ һомологшын ерэхэдэ, ажалынь урагшатай байха. «Метрополь» бүлэг барилга, хадын үйлэдбэри болог аяншалгын һалбарида анхаралаа хандуулан, ажалаа ябуулха. Аэаропортын хүтэлбэрилэгшэ һэлгэгдэжэ, «Байкал» аэропорт хүгжэхэ », - гэжэ аэропортын хүтэлбэрилэгшэ байһан Михаил Слипенчук тодорхойлбо.
Роман Троценкын хэлэһээр, «Байкал» аэропорт аяншалга болон олзын хэрэг хүгжөөхэдэ тааруу газарта баригданхай.
Аэропортдо ниидэлгэ-буулгын шэнэ зурууд баригдажа байна. Тэрэнэй барилга «2018 он болотор Алас Дурна зүгэй болон Байгалай можын эдэй засагай болон нигэмэй хүгжэлтэ» гэһэн федеральна программын ёһоор бэелүүлэгдэнэ. Энэ түсэл бэелүүлгэдэ дүрбэн миллиард тухай мүнгэн һомологдохо юм. Ниидэлгэ-буулгын зуруудай утань дүрбэн модо, үргэниинь – 45 метр байха. Зурууд стандартын эрилтэнүүдтэ тааруугаар хэгдэжэ, бүхы түхэлэй агаарай онгосонууд эндэ бууха аргатай болохо.
Ородой Холбоото Уласай Транспортын сайд Максим Соколовой хэлэһээр, «Байкал» аэропорт «нээмэл огторгой» гэжэ нэрэ зэргэтэй боложо, уласхоорондын зэргэтэй агаарай онгосонууд аэропортдо буужа, хүнүүдые, ашаа шэрэхэ аргатай болохо.
Новапорт хадаа Ород гүрэнэй можо нютагуудай аэропортнуудай бүлэг болоно. Тэрэнэй бүридэлдэ Новосибирск, Томск, Кемерово, Барнаул, Шэтэ, Тюмень, Челябинск, Пермь, Волгоград, Астрахань, Минеральные Воды, Мурманск болон Калининград хотонуудай аэропортнуд ородог. Шэнэ аэропортнуудые худалдан абаха хэрэгтэ, хүгжэлтын программануудые бэелүүлгэдэ холдинг эдэбхитэйгээр мүнгэ һомолжо, аэропортын хангалгын байгууламжа болон туһаламжа үзүүлхэ талаар шанараа дээшэлүүлэн байдаг. AEON Corporation болон Meridian Capital бүлэгүүд энэ эмхиин акционернүүд юм.
Анна Огороднигой гэрэл зураг.
