993
Буряад Уласай ниислэл хото «Стартап-столица России-2018» гэһэн бүхэроссиин онлайн-һунгалтада түрүүлбэ.
«Сколково» жасын юрэнхылэгшэ Виктор Вексельберг болон «Ростехнологии» гэһэн гүрэнэй корпорациин захиралай орлогшо Владимир Артяков гэгшэд Буряад Уласай Толгойлогшо Алексей Цыденовтэ мүрысөөндэ илаһан үнэмшэлгэ болон тусхай шан үсэгэлдэр уласхоорондын хуралдаанда барюулба.
Буряад уласай ажаһуугшад энэ хэмжээ ябуулгада эдэбхитэйгээр хабаадаа гэжэ һунгалта эмхидхэгшэд тэмдэглэбэ.
Энэ түсэл шэнэ юумэ нэбтэрүүлдэг залуушуул болон олзын хэрэг эрхилэгшэдтэ удха шанартай гэжэ Алексей Цыденов хэлэбэ.
Онлайн-һунгалтын үедэ Красноярск, Новокузнецк, Тюмень, Ижевск, Калининград, Южно-Сахалинск, Великий Новгород, Белгород хотонуудһаа эгээл олон дуун Улаан-Үдэ хотодо үгтэһэн байна. Стартап-ниислэл гэһэн нэрэ зэргэтэй болоһон түб хото тусхай хүнгэлэлтэнүүдтэ хүртэхэ. «Сколково» жасын эмхидхэһэн мүрысөөндэ хабаадаха тухай мэдүүлгэ оруулагшад Европын «Startup Village 2018» хуралдаанда уригдаха юм. Мүрысөөндэ илагшад ямаршье түлбэригүйгөөр Москва хото ошожо, «Сколково» жасын мэргэжэлтэдтэй харилсажа, өөдынгөө түсэл бэелүүлхэ талаар һургаал заабари абаха, хоёр сая түхэриг хүрэтэр грантын тэдхэмжэдэ хүртэхэ аргатай. Тиихэдэ онлайн-мүрысөөндэ илаһан Улаан-Үдэ хотодо 2018 ондо олон зоной хабаадалгатай стартап-тур эмхидхэгдэжэ, «Сколково» жасын мэргэжэлтэ шүүбэришэд, мүнгэ һомологшодтой Буряад уласай олзын хэрэг эрхилэгшэд, компанинуудай түлөөлэгшэд уулзаха аргатай болоно.
Буряад Уласай Засагай газарай сайтһаа гэрэл зураг абтаба.
