1110
Байгша оной декабриин 24-дэ Буряад Уласай Толгойлогшо Алексей Цыденов албанай хэрэгээр Хяагта аймагаар ябахадаа, Сэлэнгэ гол дээгүүр хүүргэ нээлгын баяр ёһололдо хабаадаба. Тиихэдэ аймагта болбосоролой эмхи зургаанууд нээгдэжэ, бүхэ барилдаагаар мүрысөөн үнгэргэгдэһэн байна.
А-340 гэһэн федеральна харгын 182-190 модоной зайда «Улаан-Үдэ-Хяагта – Монгол гүрэнтэй хилэ» харгы заһабарилагдажа, тэрэнэй ашаглалгада тушаагдаха баяр ёһололдо Буряад Уласай Толгойлогшо хабаадаба. Энэ хэмжээ ябуулгада «Южный Байкал» гэһэн федеральна эмхиин дарга Радик Фаразутдинов болон Хяагта аймагай гулваа Александр Буянтуев гэгшэд хабаадалсаа. 2017 ондо А-340 гэһэн харгыда харгы заһабарилдаг федеральна эмхиин хүдэлмэрилэгшэд 40 модоной зайда заһабарилгын ажал хэһэнбайна. Заһабарилгын ажалда 700 саяһаа дээшэ түхэриг гаргашалагдаа. 2019 он болотор Улаан-Үдэ – Хяагта харгыда 149 модоной зайда шэнэдхэн заһабарилга хэгдэхэ.
Удаань Алексей Цыденов Наушки һууринда Сэлэнгэ гол дээгүүр «Платон» системээр баригдаһан хүүргэ нээлгын баяр ёһололдо хабаадаа.
«Улас дотор «Платон» системээр баригдаһан хоёрдохи хүүргэ болоно. Буряад Уласай Хяагта болон Зэдэ аймагууд энэ хүүргээр холбогдобо. Хүүргэ нээгдэһэн, аймагууд хоорондо түхэреэн жэлэй туршада холбоотой болоһон баяраар бултаниие амаршалнаб», - гэжэ Алексей Цыденов хэлэбэ.
Хүүргэ барилгада түсэлэй-тоололгын дансануудтай хамта бүхыдөө 63 сая тухай түхэриг мүнгэн гаргашалагдаа. Хүүргэдэ ерэһэн харгытай хамта хүүргын утань 2,7 модо болоно. Энээнһээ урид байһан хүүргэ үмхиржэ, барилга хэгдэбэ. Шэнэ хүүргэ барилгада «Платон» системэ 55,2 сая түхэриг, тиихэдэ уласай болон Хяагта аймагай һанһаа мүнгэн һомологдоо.
Хяагта аймагай гулваа шэнэ хүүргэ болон харгын ашаглалгада тушаагдаһанда баяраа мэдүүлбэ.
«Мүнөөдэр ехэ үйлэ хэрэг боложо байна, федеральна харгы заһабарилагдажа, Наушки һууринда шэнэ хүүргэ ашаглалгада тушаагдаба. Алексей Самбуевичта баяраа хүргэнэб, танай улас хүтэлбэрилһэнһөө хойшо харгын ажахын һалбарида хубилалтанууд болоно. Ажаһуугшадта баяраа мэдүүлнэб. Наушки һуурин Ородой Холбоото Уласай транспортын һалбарида ехэ удха шанартай», - гэжэ Александр Буянтуев тэмдэглэбэ.
Буряад Уласай Толголйогшо аймагай түб Хяагта хотодо хэдэн хэмжээ ябуулгануудта хабаадаба. Хяагта хотодо Ленинэй нэрэмжэтэ гудамжада харгы заһабарилагдаа, нэмэлтэ болбосоролой түбэй шэнэ корпус, Хяагтын 4 дугаар һургуулида эхин классуудай болон хүүгэдэй урлагай һургуулиин нэмэлтэ байшангууд нээгдэһэн байна.
Удаань II-дохи Пандидо Хамба лама Содномпил Хэтэрхеевэй дурасхаалда зорюулагдаһан бүхэ барилдаагаар уласай 10-дахи мүрысөөндэ Алексей Цыденов хүрэһэн байна. Тиихэдэ «Хяагта» гэһэн машинаар гараха уласхоорондын пунктда хэгдэжэ байһан һэльбэн шэнэдхэлгын ажал уласай хүтэлбэрилэгшэ хараба.
