1133
Буряад Уласай Толгойлогшо Алексей Цыденов сентябриин 4-дэ Улаан-Үдын ЛВРЗ-дэ хүрэжэ, заводой хүтэлбэрилэгшэд болон хүдэлмэрилэгшэдтэй суглаа үнгэргэһэн байна.
Улас дотор энэ завод эгээл томо үйлэдбэринүүдэй нэгэн юм. 2018 ондо ЛВРЗ Буряад Уласай бюджедтэ 499 сая түхэригэй налог татбари түлэхөөр түсэблэнэ. Энэнь нёдондонойхидо орходоо 55 сая түхэригөөр дээшэлээ. Байгша ондо заводто баһал түүхэтэ үйлэ хэрэг байгуулха түсэбтэй, тэдэнэр 934 секци локомотивуудые заһабарилха юм.
«Энэ завод үрдилдэн тэмсэхэ аргатай, үйлэдбэриин хэмжээн дээшэлээ. Мүнөө заводто зүблэлтэй сагай туйлалтанууд дээшэлүүлэгдээ. Зүүн зүгэй полигоной хүгжэлтэһөө ашаа шэрэхэ хэмжээн ехэ боложо, заһабариин ажал дээшэлхэ», - гэжэ Алексей Цыденов тэмдэглэбэ.
Заводой захиралай уялга дүүргэгшэ Сергея Заборских гэгшын хэлэһэнэй ёһоор, 2018 үйлэдбэриин хэрэгсэлнүүдэй һэльбэн шэнэдхэлгэ хараалагданхай.
«Мүнөө токарна станогууд асарагданхай, тэдэниие тодхохо талаар ажал ябуулагдана. Тиихэдэ шэрдэлгэ-хатаалгын шэнэ комплекс сентябрь һарада хүдэлжэ эхилхэ. Ород гүрэнэй түмэр замай һужаада тааража хүдэлдэг ашаа шэрэхэ локомотивуудые ехэнхидээ үйлэдбэрилнэбди. СНГ-н гүрэнүүдэй поезднуудай заһабариин хэрэгсэлнүүдые үйлэдбэрилнэбди. Монгол гүрэнтэй суг ажалланабди», - гэжэ Сергей Заборских хэлэбэ.
Заводой зарим таһагуудта гэрэлтүүлгэ шэнэлэгдэнэ, уһа алмаха талаар һэльбэн шэнэдхэлгэ хэгдэнэ. 2017 ондо зайн галай түлөө түлбэри бага болгогдожо, ЛВРЗ-дэ 16 сая түхэриг алмагдаһан байна. Энэ мүнгэн үйлэдбэриин хүгжэлтэдэ дамжуулагдаа.
Улаан-Үдын ЛВРЗ-н ахамад инженерэй уялга дүүргэгшэ Владимир Филатовай хэлэһээр, шэнэ үйлэдбэри байгуулгада мүнгэн дамжуулагдаа.
Түмэр замай машиностроениин һалбари хүгжөөхэ талаар ЛВРЗ хадаа шэнэ юумэ нэбтэрүүлгын талмай болонхой.
