1293
Байгша оной октябриин 25-да Буряад Уласай Арадай Хуралда «2019 ондо болон түсэблэлгын 2020, 2021 жэлнүүдтэ уласай бюджет тухай» гэһэн олониитын хабаадалгатай танилсуулга үнгэргэгдэбэ. Буряад Уласай Засагай газар, Арадай Хурал болон Тоололгын танхим гурбан жэлээр абтаха энэ дансаар ажал үшөө ябуулха юм.
Буряад Уласай Засагай газарай Түрүүлэгшын нэгэдэхи орлогшо, Буряадай Толгойлогшын Арадай Хуралда Бүрин эрхэтэ түлөөлэгшэ Игорь Шутенков уласай мүнгэн һангай энэ дансын шухалыень тэмдэглэбэ.
«Буряад Уласай бүхы ажаһуугшадай байдалда уласай бюджет нүлөөлнэ, бюджедэй бодолго уласай ниигэмэй-эдэй засагай хүгжэлтэтэй нягта холбоотой. Тиимэһээ олониитын хабаадалгатай бюджедэй уншалгануудта нютагай засагай байгууламжануудай, олониитын эмхинүүдэй һанал бодол мэдэнэбди», - гэжэ Игорь Шутенков хэлэбэ.
Хэмжээ ябуулгын үедэ уласай ниигэмэй-эдэй засагай хүгжэлтын, аймагуудые дэмжэлгын асуудалнуудаар дурадхалнууд оруулагдаа. Тиимэһээ Буряад Уласай Арадай Хурал, Засагай газар болон Тоололгын танхимай түлөөлэгшэдһөө ажалай бүлэгүүд байгуулагдажа, хуулиин данса дээрэ ажал ябуулагдаха. Тиихэдээ Ородой Холбоото Уласай Юрэнхылэгшын 2018 оной «майн тогтоолнуудта» тэмдэглэгдэһэн үндэһэтэнэй түсэлнүүдтэ онсо анхарал хандуулагдаха.
«Ородой Холбоото Уласай хэмжээндэ бүхы можо нютагуудһаа мэдүүлгэнүүд ороһоор. Тиимэһээ эдэ түсэлнүүд уласта бэелүүлэгдэхэ гү гэжэ эли бэшэ. Үндэһэтэнэй түсэлнүүдтэ хабаадаха гэжэ мэдүүлгэнүүдые орууланхайбди», - Буряад Уласай Засагай газарай Түрүүлэгшын нэгэдэхи орлогшо хэлэбэ.
Тиихэдэ нютагай засагай байгууламжануудай бюджедэй талаар асуудалнууд дүүрэн шиидхэгдээгүй. Олониитын хангалга байгууламжын хүгжэлтэдэ үзүүлхэ тэдхэмжэдэ 2018 онойхиһоо багаар түсэблэгдэнхэй.
«Бюджет оёоргүй бэшэ гэжэ бултанай ойлгохо шухала. Тиимэһээ тэрэ данса дээрэ ажал ябуулхадаа, тон шухала, хэрэгтэй, аша үрэтэй хэрэгүүдые элирүүлхэ ёһотойбди», - гэжэ Игорь Шутенков тобшолбо.
