1121
Үбэр Байгалай хизаарһаа сенатор, Федерациин Зүблэлэй Хамгаалалтын ба аюулгүйн хорооной гэшүүн Баир Жамсуевтай хөөрэлдөө – та олоной анхаралда
-Та 1997 онһоо 2008 он болотор Хитадтай хилэ нэгэтэй Агын Буряадай бэеэ даанги тойрогой засаг дарга байгаат. Можо нютагта Хитад гүрэнэй эдэй засагай талаар даралтань ямар һэн бэ?
- Энэ гүрэн хүнгэн ажаүйлэдбэриин хямда эд бараагаар дэбисхэрыемнай дүүргэжэрхёо. Тиигэжэ 1990-ээд онуудта хүн зон хубсалаа болохо, үри хүүгэдээ һургуулидань бэлдэхэ аргатай байгаа. Гэбэшье һүүлэй һүүлдэ хитад эд бараан Үбэр Байгалай хизаарай хүнгэн ажаүйлэдбэриие һалгаагаа, нарин нооһото хонин ажалые үгы хээ.
— Федеральна гүрэнэй ехэ-ехэ дэмжэлгэгүйгөөр үйлэдбэриин һандарал доройтолгые болюулхын аргагүй...
— Зүб даа. Тиимэһээл юрэнхылэгшэ Владимир Путин майн зарлиг болон Федеральна суглаанда хандалга соогоо амин шухала зорилгонуудые табяа. Алас Дурнын хооһоржо байхые, хүн зонойнь нүүжэ байхые харана ха юм. Хүнэй хүдэлхэ ехэ үйлэдбэринүүд гэжэ үгы.
Алас Дурнада ажаһуудалай хэмжээн гүрэн доторхи дунда зэргын хэмжээнһээ сохом дээрэ байха ёһотой. Яагаад энээниие туйлахаб? Элдэб янзын хүнгэлэлтэнүүдэй, уридшалһан хүгжэлтын дэбисхэрнүүдые байгуулһанай, алас дурнын гектарай, Владивосток портын сүлөө гуримай ашаар. Ниигэмэй хангамжын һалбари байгуулха шухала: хүүгэдэй сэсэрлигүүд, һургуулинууд, харгынууд, аргын газарнууд болон бусад баригдаха ёһотой. Мүн тиихэдэ хүн зоной Алас Дурна руу зорихынь тула хүнгэлэлтэтэй биледүүд хэрэгтэй. Тэндэһээ ажаһуугшадайнь гаража ошолгые болюулаагүй һаа, бүхыдөө гүрэнэймнай аюулгүйдэ муугаар нүлөөлхэ бшуу.
— Та хүтэлбэрилхы ехэ дүй дүршэлтэйт. Танай һанамжаар, ямар дүрим баримталха хэрэгтэйб?
— Хүн зоной ашаг олзо, һанал бодолынь - эгээл шухала. Хүтэлбэрилэгшэ зорилгото тоо баримтануудые туйлаха гэшоод лэ, өөрынгөөл мэдэхэ соо мунхижа ябаха ёһогүй. Гол зорилгонь – зоной һайн ажабайдал. Ноёд һайд манайл түлөө хүдэлнэ гэжэ мэдэрхэдээ, ажаһуугшад засаг хүндэлдэг. Зонтой ходо харилсажа, ажал хэрэгүүдээ, бэрхэшээлнүүдээ зүбшэн хэлсэжэ байха шухала.
— Засаг гээшэмнай юунэй түлөө хэрэгтэй юм?
— Засаг бариха – элдэб үйлэнүүдые хүтэлхэ. Засаг хадаа газар дэбисхэрээ ниигэмэй-эдэй засагай талаар хүгжөөхын, зонойнгоо ажабайдал һайжаруулхын тула хэрэгтэй.
Саркис Цатурян
Гэрэл зураг: eadaily.com
