1117
Мартын 28-30-ай үдэрнүүдтэ Улаан-Үдэдэ «Baikal Trade - 2019» гэһэн үзэсхэлэн-яармаг эмхидхэгдээ. Энэ хэмжээ ябуулгада Монголой 20 компани: «Гоёл кашмер», «Багануур нэхий», «Zula TS», «Гоёо», «МонКрем», «Багануур нэхий» болон бусад эмхинүүд тэмээнэй, хониной нооһоор нэхэһэн хубсаһа, арһаар бүтээгдэһэн гутал, үндэһэтэнэй хубсаһа, гоёолто, дурасхаалай бэлэгүүдые үйлэдбэрилэгшэдэй сэнгээр худалдаһан байна. Тиихэдэ Буряад Уласай «Вода Бурятии», «Байкалия», «Диамед», «Ольхон», «Молоко Бурятии», «Геалан групп», «Улаан-Үдын птицефабрика» болон бусад – хамта 30 эмхи үйлэдбэрилдэг эдеэ хоол, эд бараа дэлгээ. «Бурятхлебпром» бүлгэм үзэсхэлэндэ үйлэдбэрилдэг эдеэ хоолоо дэлгэхэһээ гадуур, Монголой делегаци заводтоо уриһан байна.
Улаан-Үдэдэ эмхидхэгдэһэн үзэсхэлэндэ Монголой болон Буряадай суута газарнуудаар аяншалга тухай харуулаа. Буряадай ажаһуугшад болон айлшад бэеынгээ тамир шалгахаяа, эмнэлгын түбтэ хандаха аргатай байгаа. Хүршэ гүрэнэй түлөөлэгшэд эмхидхэгдэһэн үзэсхэлэн-яармаг үндэр хэмжээндэ үнгэрөө гэжэ тэмдэглэһэн байна.
Буряад уласай олзын хэрэг эрхилэгшэд, ажаһуугшад эдэбхитэйгээр тус хэмжээ ябуулгада ябаһан байна. Тиихэдэ Монгол гүрэнэй гадаадын хэрэгүүдэй яаманай хүтэлбэрилэгшэ Дамдинсурэн Даваасурэн түрүүтэй 40 компаниин түлөөлэгшэд ерээ гээд тэмдэглэлтэй.
- Худалдаа-найманай һалбарида хоёр гүрэнэй харилсаан үргэлжэлжэ байхада, бидэ ехэ баяртайбди, - гэжэ Буряад уласай Засагай газарай Түрүүлэгшын нэгэдэхи орлогшын уялга дүүргэгшэ Игорь Зураев хэлэбэ.
Анна Огороднигой гэрэл зураг
