986
Буряад уласта ажалгүй хүнүүдые дэмжэхэ талаар ажал үргэлжэлүүлэгдэнэ. Ажалаар хангадаг албанай дэмжэлгээр улас дотор 300-һаа дээшэ хүн олзын хэрэг эрхилхэ аргатай болобо. Нэгэ доро үзүүлэгдэхэ мүнгэн тэдхэмжын хэмжээн 100 мянган тухай түхэриг болоно. Буряад Уласай Засагай газар 2019 ондо энэ хэрэгтэ 40 сая түхэриг һомолоо.
Олзын хэрэг эрхилхэ дуратайшуул ажалаар хангадаг албанай түбтэ тусхай шалгалта гаража, олзын хэрэг эрхилхэ талаар заабари абаха юм. Тэрэшэлэн үмсын эмхи байгуулжа, татабари, эрхын талаар зүбшэлнүүдые абаха талаар түлбэринь бусаагдаха гэжэ уласай ажалаар хангадаг албанда дуулгаба.
Олзын хэрэг эрхилхэ дуратайшуулай бизнес-түсэлнүүдтэй мэргэжэлтэ шүүбэришэдэй комисси танилсажа, мүнгэн туһаламжа үзүүлхэ тухай шиидхэбэри абаха юм. Бүридхэлдэ абтаһан ажаһуудаг газарайнгаа ажалаар хангадаг албанда хандажа, гүрэнэй туһаламжада хүртэхэ арга ажаһуугшадта олгогдоно. Тиихэдэ 41-70-41 гэһэн утаһаар хандажа, тодорхой мэдээсэл абажа болоно.
Олзын хэрэг эрхилэлгын урагшатай һалбаринууд гэхэдэ, аяншалга, зошод буудалай ажахы, арадай уран бүтээл, хүдөө ажахын үйлэдбэри болоно. Тиихэдэ ажаһуугшад болбосоролой, эмнэлгын, юридическэ, бухгалтерэй, үһэ хайшалалгын, хубсаһа оёхо һалбаринуудта олзын хэрэг эрхилхэ аргатай .
Буряад Уласай Толгойлогшо Алексей Цыденовэй эдэбхи үүсхэлээр гшүрэнэй туһаламажыын хэмжээн 2018 ондо дээшэлүүлэгдээ. Энээнһээ урид олзын хэрэг эрхилэлгэдэ 58 мянган түхэриг түлэгдэдэг һэн.
