771
Владивосток хотын Алас Дурнын федеральна ехэ һургуулиин талмайда Зүүн зүгэй эдэй засагай хуралдаан заншалта ёһоороо үнгэргэгдэхэ.
Буряад Уласай эдэй засагай сайд Александр Бардалеевэй хэлэһээр, байгша оной эдэй засагай хуралдаан 2025 он болотор Алас Дурнын хүгжэлтын Үндэһэтэнэй программада зорюулагдаха юм.
- Буряад улас анха түрүүшынхиеэ энэ хуралдаанда хабаадаха. Манай уласай залуушуул Зүүн зүгэй хуралдаанай ажалда олоороо эдэбхитэйгээр хабаадаг лэ, - гэжэ эдэй засагай сайд тэмдэглэбэ.
Алас Дурнын федеральна тойрогой эрхим залуушуул айлшадые угтаха болон бусад хэмжээ ябуулгануудта хабаадаха. Августын 15-һаа сентябриин 7 болотор эдэнэр айлшадые бүридхэлдэ абаха газарнуудта туһа хүргэхэ, августын 30-һаа сентябриин 6 болотор холо оршодог объектнүүдтэ ажал ябуулха, сентябриин 3-6-ай үдэрнүүдтэ хуралдаанай үнгэрхэ түб талмайда хүдэлхэ юм.
Тиихэдэ волонтёрнууд мэдээсэлэй таһагуудта хүдэлхэ, гараһан асуудалнуудаар хабаадагшадта, сурбалжалагшадта туһа хүргэхэ, транспортын ажал залан хүтэлбэрилхэһээ эхилээд, олон үүргэнүүдые дүүргэхэ юм. Һайн дураараа туһа хүргэгшэд Русский олтирогто түлбэригүйгөөр байрлаха, эдеэлхэ. Залуушуулда нэгэ адли хубсаһан үгтэхэ, тиихэдэ тэдэнэр тусхай һуралсал гараха болоно.
Зүүн зүгэй эдэй засагай хуралдаанда туһа хүргэхэ залуушуул англи хэлэ мэдэхэ, тордиһогүй ород хэлэтэй, хүнээр хөөрэлдэжэ ядахагүй, харюусалгатай байха ёһотой.
Алас Дурнын тойрогто үнгэрхэ хэмжээ ябуулгада хабаадаха гэбэл, www.congress.ru сайтда бүридхэлдэ абтажа, өөр тухайгаа мэдээсэл, гэрэл зурагаа оруулха болоно. Май, июнь һарануудта залуушуултай уулзалга эмхидхэгдэжэ, шэлэн абалгын шата гараһан хүнүүд август һарын һүүл багта һуралсал гараха. Асуудалнуудай гарабал [email protected] гэһэн сахим хаяагаар хандаха арга олгогдоно.
Тобшо мэдээн:
Зүүн зүгэй эдэй засагай хуралдаан 2015 онһоо хойшо жэл бүри эмхидхэгдэнэ. Ородой Холбоото Уласай болон Азиин-Номгон далай дэбисхэрэй гүрэнүүдэй түлөөлэгшэд уулзажа, дэлхэйн эдэй засагай шухала асуудалнуудаар, үйлэдбэриин болон технологинуудай шэнэ һалбаринуудые хүгжөөхэ тухай, бэелүүлхэ томо зорилгонууд тухай хэлсэдэг.
Буряад Уласай эдэй засагай яаманай мэдээсэлэй албанай гэрэл зураг
