1996
Арктика болон Алас Дурнын зүг хүжөөлгын сайд Александр Козлов Буряад улас албанай хэрэгээр ерэжэ, Улаан-Үдын «Трамвайн хүтэлбэри» эмхидэ хүрэбэ.
Федеральна сайд тус эмхиин цехүүдээр ябажа, хүдэлмэрилэгшэдтэйнь, ажалтайнь танилсаһан байна. Удаань Улаан-Үдын хүтэлбэрилэгшэдтэ 500 саяһаа дээшэ түхэригэй 12 трамвай абаха үнэмшэлгэ барюулаа. Александр Козловой хэлэһэнэй ёһоор, Юрий Трутневай хүтэлбэрилһэн зүблөөндэ уласай болон хотын захиргаанай эдэбхи үүсхэл дэмжэгдээ.
- Улаан-Үдэдэ трамвай ехэ шухала транспорт болоно. Трамвайн ябадаг харгынууд, вагонууд һэлгэгдэхээр болонхой. 2008 ондо һүүүлшынхиеэ шэнэ трамвай абтаһан байна. Буряад Улас Алас Дурнын федеральна тойрогой бүридэлдэ оруулагдажа, мүнгэн һомологдоно. Алексей Самбуевичтай хамта завод ошожо, шэнэ 12 трамвай харахабди. Байгша ондо шэнэ трамвайнууд Улаан-Үдэ асарха тухай заводой хүтэлбэрилэгшэдтэй хэлсээбди, - гэжэ Александр Козлов хэлэбэ.
Программын хэмжээндэ Улаан-Үдэдэ трамвайн ябадаг харгынууд гурбан жэлэй туршада 6,5 модоной зайда шэнэлэгдэхэ, байгша ондо - 1,8 зайда.
Улаан-Үдэ хотын захиргаанай хүтэлбэрилэгшын уялга дүүргэгшэ Игорь Шутенковэй хэлэһэнэй ёһоор, Улаан-Үдын ажаһуугшад шэнэ трамвайнуудтай болохоёо үнинэй хүсэдэг һэн. Мүнөө трамвайнуудые асаржа, тэдэнииие харгыда гаргаха зорилготойбди гэжэ сайд тэмдэглэбэ.
Буряад Уласай Толгойлогшо Алексей ЦыденовАлександр Козловто баяр хүргэбэ.
- Алас Дурнын тойрогой тэдхэмжын талаар асуудалнуудаар хэлсэнэбди. Байгша ондо 3,3 миллиард түхэриг һомологдохо, - гэжэ Алексей Цыденов хэлэбэ.
Буряад уласай хүтэлбэрилэгшын табиһан шиидхэхэ асуудалнууд олон, ажаһуугшадай байдал һайжаруулха талаар зорилгонууд олон гэжэ федеральна сайд харюусаа.
Анна Огороднигой гэрэл зураг
