1093
«Гэр байра болон хотын оршон» гэһэн үндэһэтэнэй түсэлэй хэмжээндэ «Болбосон түхэлтэй хотын оршон» гэһэн программаар жэлэй дүүрэтэр Буряад уласта олониитын 122 газар болон олон байратай гэрнүүдэй шадархи 104 хоройдо заһабарилгын ажал хэгдэхэ.
Мүнөө Улаан-үдэ хото болон Буряад уласай аймагуудта заһабарилгын ажал ябуулха эмхинүүдэй мүрысөөн үнгэргэгдэнэ. Май, июнь һарануудта хэлсээнүүдые баталхаар түсэблэгдэнхэй.
Закаменск хотодо хүүгэдэй тамирай талмайнуудта тоног хэрэгсэлннүдые худалдан абаха хэлсээнүүд баталагданхай. Бүхыдөө Закаменск хотодо олониитын газарнуудай заһабарилгада 4,3 сая түхэриг һомологдохо, олон байратай гэрнүүд шадар 11 хорой дотор һэльбэн шэнэдхэлгэдэ 6,4 сая түхэриг шэглүүлэгдэхэ юм. Хяагта хотодо хилэ сахигшадай дурасхаалай «Дозор» гэһэн баримал табихаар хэлсээн баталагданхай. Гусиноозерск хотодо «Болбосон түхэлтэй хотын оршон» гэһэн программаар 8 сая түхэригэй заһабарилгын ажал хэгдэхэ.
«Болбосон түхэлтэй хотын оршон» гэһэн федеральна түсэл Буряадта 2017 онһоо хойшо бэелүүлэгдэнэ. Байгша онһоо эхилжэ тус программа үндэһэтэнэй «Гэр байра болон хотын оршон» түсэлэй хэмжээндэ бэелүүлэгдэхэ. Тус түсэлөөр 2019 ондо Буряад уласта 306 сая түхэриг һомологдохо, тэрэнэй 300-иинь – федеральна бюджетһээ. Бүхыдөө үндэһэтэнэй түсэлэй бэелүүлэгдэхэ 2019-2024 онуудта Буряад уласта 1,5 миллиардһаа дээшэ мүнгэн һомологдохо гэжэ Буряад Уласай барилгын яаманда тэмдэглэбэ.
