1314
Алас Дурнын тойрогой тэдхэмжын хэмжээндэ Улаан-Үдын 4-дэхи больницын ехэ заһабарилгада 57,7 сая түхэриг һомологдобо. 1962 ондо ашаглалгада тушаагдаһан эмнэлгын газарта ехэ заһабарилга хэгдээгүй гээд тэмдэглэлтэй. Улаан-Үдэ хотын 4-дэхи больницада вентиляци хуушаржа, САНПИНай эрилтэнүүдтэ тааранагүй.
- Больницада ариг сэбэр, дулаан байгуулха талаар вентици шухала юм, - хотын 4-дэхи больницын ахамад врач Тамара Бидагаева хэлэбэ.
Вентиляци шэнэлэлгэдэ 50 сая түхэриг һомологдохо. Хүүгэдэй поликлиникэдэ заһабарилгын ажалнуудта 7,7 сая шэглүүлэгдэхэ. Долоон дабхартай хүүгэдэй поликлиника 1987 ондо баригдаһан байна. Тиихэжэ тус байшанда танхимууд шэнээр түсэблэдэжэ, хана, шала шэнэлэгдэхэ, дулаалагдаха юм.
Буряад уласта хүүгэдэй поликлиникэнүүдэй зөөриин-оньһон хэрэгсэлнүүдэй бааза шэнэлхэ, бэхижүүлхэ талаар федеральна болон уласай программанууд бэелүүлэгдэнэ.Үнгэрһэн жэлдэ Бэшүүр аймагай хүүгэдэй поликлиникэ заһабарилагдаа, Түнхэн аймагай больницын хүүгэдэй таһаг болбосон түхэлтэй шэнэ байшанда зөөжэ ороһон байна.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди. Алас Дурнын тойрогой тэдхэмжээр аймагуудай болон хотын 3-3 эмнэлгын газарта заһабарилгын ажал хэгдэхэ.
Буряад Уласай Засагай газарай мэдээсэлэй албанай гэрэл зураг
