1107
Эмнэлгын шэнэ хэрэгсэлнүүдэй ашаар уушханай, хабдарта болон бусад үбшэнүүд эхин шатада элирүүлэгдэхэ. Ажаһуугшадта һайн шанартай эмнэлгын туһа хүргэгдэхэ юм.
«Уласай элүүрые хамгаалгын һалбарида урагшаа ехэ алхам хэгдэнэ. Эмшэдшье урматай. Шухалань гэхэдэ, ажаһуугшадтаа һайн шанартай эмнэлгын туһаламжа үзүүлхэ аргатайбди», - гэжэ Буряад Уласай элүүрые хамгаалгын сайд Дамбинима Самбуев хэлэбэ.
Тиихэдэ Алас Дурнын тойрогой тэдхэмжын хэмжээндэ һомологдоһон мүнгөөр 27 рентген аппарат, 17 маммограф, уушханай үбшэ элирүүлхэ 16 флюроограф, УЗИ хэхэ хэрэгсэлнүүд болон шуһа хэмэл аргаар гүйлгэхэ аппарат худалдан абтаха юм.
Мүнөө улас дотор, илангаяа аймагуудта, эмнэлгын хуушарһан хэргсэлнүүд ашаглагдана. Тиихэдэ тэдэниие заһабарилгада ехэ мүнгэн гаргашалагдана. Алас Дурнын тойрогой тэдхэмжын хэмжээндэ эдэ асуудалнууд шиидхэгдэхэ.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди. Тиихэдэ элүүрые хамгаалгын һалбарида 8 эмхи заһабарилгада, эмнэлгын хэрэгсэлнүүдые худалдан абалгада 1,3 миллиард түхэриг һомологдоо.
Буряад Уласай Засагай газарай мэдээсэлэй албанай гэрэл зураг
