992
Байгал далай шадарай Баргажан, Хойто-Байгалай, Байгал шадарай, Кабанск аймагуудай ажаһуугшадата омоли загаһа бариха хорюулай үзүүлһэн хохидол усадхаха талаар хэмжээ ябуулганууд Буряад Уласай Засагай газарта хинагдана. Буряад уласта омоли загаһа бариха хорюулай абтаһанай удаа ажалаар хангадаг уласай албанда «Ранжуровский» болон «Кабанский рыбзавод» кооперативуудай 46 хүдэлмэрилэгшэд хандаһан байна. Тиигэжэ эдэ хоёр эмхинүүдэй хүдэлмэрилэгшэдтэ тус албанһаа саг зуура ажалтай болохо талаар туһаламжа үзүүлэгдэнэ.
Май һараһаа ноябрь болотор омоли загаһа бариха хорюулай үедэ кооперативуудай ажалшадта мүнгэн түлэгдэнэ. Энэ туһаламжа үзүүлгэдэ 2019 ондо уласай бюджетһээ 5,9 саяһаа дээшэ гаргашалгадаха. Бэшэ сагта эдэ үйлэдбэринүүд ондоо загаһа бариха аргатай.
Омоли загаһа бариха хорюулһаа боложо, ажалаар хангадаг уласай албан мүнгэн тэдхэмжэ үзүүлхэһээ гадна, ондоо мэргэжэлтэй болохо, олзын хэрэг эрхилхэ талаар түлбэригүй туһа хүргэхэ юм. Эдэ асуудалнуудаар 41-70-41 гэһэн утаһаар хандажа болоно.
«Ажаһуугшадые ажалаар хангалгада туһа хүргэлгэ» гэһэн гүрэнэй программын хэмжээндэ туһаламжа үзүүлэгдэнэ.
Тиихэдэ Ородой Холбоото Уласай Юрэнхылэгшэ Владимир Путинай 2017 оной декабриин 14-дэ үнгэргэһэн пресс-конференциин дүнгүүдээр, омоли загаһа бариха талаар абтаһан хизаарлалтаһаа боложо, ажалгүй болоһон хүдэлмэрилэгшэдые ажалаар хангаха гэһэн даалгабаряар хэмжээ ябуулганууд бэелүүлэгдэнэ гээд тэмдэглэлтэй
