​​Улаан-Үдэдэ тахяашадай хуралдаан үнгэргэгдэнэ

Мүнөөдэр манай гүрэнэй шубуу үсхэбэрилэгшэд Улаан-Үдэ хотодо ээлжээтэ хуралдаандаа сугларба. Заншалта болоһон “Байгалай форум" мүнөө жэл 25-дахияа үнгэргэгдэнэ. Хэмжээ ябуулгада хари гүрэнүүдһээ 3000 экспертнүүд ерээ.

Хуралдаан июлиин 5 болотор үргэлжэлхэ. Дэлхэйн суута шубуушад дүй дүршэлөөрөө андалдаха. Шубуу үсхэбэрилдэг ажахыда яагаад тааруу тэжээл зохёохоб, ямар онол аргаар үйлэдбэри байгуулхаб, мүн шэнэ оньһото хэрэгсэлнүүд тухай дүхэриг шэрээнүүд, үгэ андалдаанууд үнгэрхэ юм. Эндэ Ородой Холбоото Улас, Беларусь, Казахстан болон бусад гүрэнүүдэй тахяа үсхэбэрилдэг 50 ехэ фабрикын хүтэлбэрилэгшэд, мэргэжэлтэд ерэнхэй.

Буряадай тоо бүридхэлэй албанай мэдээгээр, уласаймнай ажахынуудта хамта дээрээ 449203 тахяа тоологдоно. Тэдэнэй 143852-ынь үмсын ажахынуудта үсхэбэрилэгдэнэ.

Улаан-Үдын тахяагай фабрикада энэ жэлэй январиин 1-эй байдалаар, 28738 тахяа тэжээгдэжэ байгаа. 2018 ондо 60 сая 200 мянган үндэгэн үйлэдбэрилэгдөө. Мүнөө жэлэй 5 һарын туршада 27 сая 220 мянган үндэгэн абтаа юм. 

Буряад Уласай Хүдөө ажахын болон эдеэ хоолой яаманай мэдээсэлэй албанай гэрэл зураг