896
Буряад Уласай эдэй засагай хүгжэлтын ниигэмэй түсэбүүдэй хэмжээндэ 9,3 мянган үхибүүдэй һурадаг 21 һургуули шэнэлэгдэхэ. Буряад Уласай Болбосоролой болон эрдэм ухаанай сайд Баир Жалсанов һуралсалай шэнэ жэлдэ һургуулинуудай хэр зэргэ бэлэн тухайнь Засагай газарай суглаанда хэлэбэ.
Улас дотор бүхыдөө болбосоролой 459 эмхи. Уридшалһан мэдээгээр, сентябриин 1-һээ 145 мянган үхибүүд һургуулида һураха, тэдэнэй 16,5 мянган үхибүүд анха түрүүшынхиеэ һургуулиин богоһо алхаха гэжэ тоологдоно. Һургуулинуудай заһабарилгада федеральна, уласай болон аймагуудай бюджедүүдһээ 724,5 сая түхэриг һомологдоо.
- Байгша ондо һургуулинуудай болон хүүгэдэй сэсэрлигүүдэй заһабарилгада бүхыдөө 1 миллиардһаа дээшэ түхэриг дамжуулагдаа. Энээнһээ урид ехэ заһабарилгада иимэ ехэ мүнгэн гаргашалагдадаггүй байгаа гээд тэмдэглэлтэй, - гэжэ Баир Жалсанов онсолбо.
Эгээл ехэ мүнгэн, 348,5 саяһаа дээшэ түхэриг, Алас Дурнын тойрогой хэмжээндэ 21 һургуулиин ехэ заһабарилгада һомологдоһон байна.
Тиихэдэ Аха аймагай Хара-Хужарай һургуулида заһабарилга дүүрээ. Августын 30 болотор болбосоролой үшөө 13 эмхи заһабарилагдаха.
Һуралсалай жэлэй эхилһэнэй удаа 7 һургуулида заһабарилга үргэлжэлүүлэгдэхэ. Эдэ һургуулинуудай һурагшад түрэлхидэй, Роспотребназор, болон Госпожнадзортой хэлсэгдэһэнэй ёһоор, ондоо байшанда һураха.
Тэрэшэлэн Буряад уласай бюджетһээ һомологдоһон 105,7 сая түхэригөөр 19 һургуули шэнэлэгдээ.
2019 ондо бүхыдөө 40 һургуулиин заһабарилгада 454,2 сая түхэриг гаргашалагдаа. Үнгэрһэн жэлдэ 26 һургуулиин заһабарилгада 174 сая түхэриг уласай бюджетһээ һомологдоһон байна.
Гэхэтэй хамта, һуралсалай шэнэ жэлдэ бэлдхэлэй хажуугаар «Болбосорол» гэһэн үндэһэтэнэй түсэлэй «Үхибүүн бүхэнэй амжалта» гэһэн федеральна түсэлэй хэмжээндэ аймагуудай тамирай 12 танхим заһабарилгада 35,6 сая түхэриг һомологдоо. Түймэрэй аюулгүй байдал сахиха талаар алдуунуудые усадхалгада 79 һургуулида уласай болон аймагуудай бюджедүүдһээ 20,8 саяһаа дээшэ түхэриг дамжуулагдаа.
Ехэ заһабарилга, антитеррористическэ, санитарна-эпидемиологическа хэмжээ ябуулгануудта, һуралсалай тоног хэрэгсэл, эмнэлгын кабинет хангалгада 185,2 сая тухай түхэриг гаргашалагдаа. Октябрь һарада аймагуудай 13 һургуулида нэгэ нэгэ автобус дамжуулагдаха. Тэдэниие худалдан абалгада 28,7 сая тухай мүнгэн шэлүүлэгдэһэн байна.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди. Тиигэжэ Буряад уласай мэргэжэлэй 16 эмхинүүдтэ техническэ бааза шэнэдхэлгэдэ 311,8 сая түхэриг дамжулагдаха. Тиихэдэ майн 27-до энэ түсэбтэ 278 сая түхэигэй 17 хэмжээ ябуулганууд нэмэгдэһэн байна.
Анна Огороднигой гэрэл зураг
