917
Сентябриин 1-дэ Буряад Уласай Толгойлогшо Алексей Цыденов болон Улаан-Үдэ хотын захиргаанай засаг даргын уялга дүүргэгшэ Игорь Шутенков гэгшэд албанай хэрэгээр Улаан-Үдэ хотын тамирай 18-дахи һургуули хүрэһэн байна.
Улаан-Үдын хүүгэдэй-эдиршүүлэй тамирай 18-дахи «Золотой Дракон» гэһэн һургуулиин һэльбэн шэнэдхэлгэдэ Алас Дурнын тойрогой тэдхэмжын хэмжээндэ 61 саяһаа дээшэ мүнгэн һомологдонхой. Тиигэжэ һургуулиин байшанай талмай 1000 дүрбэлжэн метр болотор үргэдхэгдэхэ. Түсэблэгдэһэнэй ёһоор, нэгэдэхи дабхарта - һорилгын танхим, хоёрдохи дабхарта нааданай, тамирай танхим байха юм. Тэрэшэлэн һургуулиин дэбисхэр болбосон түхэлтэй болгогдохо. Эрэмдэг бэетэй зоной хэрэглэхэ лифт, пандус табигдаха гэжэ түсэлөөр хараалагданхай. Байгша оной декабриин һүүл багта тус һургуули ашаглалгада тушаагдаха гэжэ түсэблэгдэнэ.
Буряад Уласай Толгойлогшо Алексей Цыденов болон Улаан-Үдэ хотын захиргаанай засаг даргын уялга дүүргэгшэ Игорь Шутенков тамирай һургуулида хэгдэжэ байһан ажал шалгажа, ашаглалгада тушаагдаха болзор болон түсэл бэелүүлгын техническэ асуудалнуудар хэлсэһэн байна.
- Заһабарилгада бага саг үгтөөшье һаань, ажал һайн шанартайгаар хэгдэхэ ёһотой, - гэжэ Игорь Шутенков тэмдэглэбэ.
Буряад Уласай Арадай Хуралай һунгамал, Буряад Уласай ушугай федерациин юрэнхылэгшэ Игорь Марковецэй хэлэһээр, иимэ танхимтай болохобди гэжэ ухаандаашье оруулагүйбди. Алас Дурнын тойрогой тэдхэмжын ашаар энэ түсэл бэелүүлэгдэжэ, Восточный һууринай ажаһуугшадта ёһотой бэлэг болохонь гэжэ һунгамал онсолбо.
Мүнөө һургуулида 600-һаа дээшэ үхибүүд һурана. Һургуулиин шэнэлэгдэһэнэй удаа энэ тоо гурба дахин ехэ болохо юм.
Улаан-Үдэ хотын захиргаанай мэдээсэлэй албанай гэрэл зураг
