819
Буряад ороной 5 мянга 500-гаад хүндэ Илалтын үдэртэ дашарамдуулан, тусхай мүнгэн түлэгдэбэ. Тэдэнэй дунда Эсэгэ ороноо хамгаалгын Агууехэ дайнда хабаадагшад, мүн наһа бараһан ветерануудай ханинар, ара талада ажаллаһан зон болон хүнгэлэлтэдэ хүртэхэ ёһотой бусад эрхэтэд оролсоо.
Байгша оной февраль һарада Ородой Юрэнхылэгшын гаргаһан Тогтоолоор Илалтын 75 жэлэй ойдо дашарамдуулан, нэгэ дахин тусхай түлбэри хэгдэхэ гэжэ тодорхойлогдоһон юм. Тиигэжэ 2020 оной майн 9 болотор дайнда шархатажа, эрэмдэг болоһон 35 хүн, мүн 151 ветеран, “Бүһэлэлтэдэ байһан Ленинградта ажаһуугша” гэһэн тэмдэгээр шагнагдаһан 13 эрхэтэн, дайнай ветерануудай 1297 ханинар, 3970 ара талын ажалшан, мүн наһа гүйсөөгүй байхадаа, концлагерьта хохидоһон 20 хүн тус түлбэри абаа гэжэ Буряадай Ниигэмэй хамгаалгын яаман мэдээсэбэ. Бүхыдөө 5486 хүн иимэ хүнгэлэлтэдэ хүртөө юм ха.
- Эсэгэ ороноо хамгаалгын Агууехэ дайнда хабаадагшын үнэмшэлгэтэйшье һаа, 1946 ондо сэрэгэй албанда татагдаһан (1928 ондо болон һүүлдэнь түрэһэн) хүнүүд тус Тогтоолой ёһоор түлбэридэ хүртэхэ эрхэгүй, - гэжэ Ниигэмэй хамгаалгын яаманай мэргэжэлтэд онсолно.
Анна Огороднигой гэрэл зураг
