1083
Ородой Холбоото Уласай Засагай газарай Түрүүлэгшын орлогшо – Ородой Холбоото Уласай Юрэнхылэгшын Алас Дурнын федеральна тойрогто бүрин эрхэтэ түлөөлэгшэ Юрий Трутнев Буряад Уласта мүнгэ хүрэнгэ оруулалгын түсэлнүүдые бэелүүлжэ байһан, бэелүүлхэ түсэбтэй олзын хэрэг эрхилэгшэдтэй уулзаба.
«Алас Дурнын федеральна тойрогой бүридэлдэ Буряад Уласай оруулагдаһаар жэлһээ үлүү саг үнгэрбэ. Уласай ниигэмэй болон эдэй засагай һалбариин хүгжэлтэ дэмжэхэ гэһэн гол зорилго табигдаһан байна. Мүнөө уридшалһан дүнгүүд согсологдоо. Эгээл шухалань гэхэдэ, Ородой Холбоото Уласай Юрэнхылэгшэ Владимир Владимирович Путинай даабаряар Алас Дурнын тойрогой хүгжэлтын талаар тэдхэмжэ Буряад уласта хабаатай болоо», - гэжэ суглаанай нээлгын үедэ Юрий Трутнев хэлэһэн байна.
Үнгэрһэн жэлэй июнь һарада Буряад уласта түрүүлэн хүгжэлтын дэбисхэр байгуулагдаа (территория опережающего развития).
«Буряад уласта энэ ажал һая эхилээ, тиимэһээ ТОР хүгжөөхэ талаар ажалаа үргэлжэлүүлхэбди», - гэжэ Юрий Трутнев тэмдэглээ.
Түрүүлэн хүгжэлтын дэбисхэрэй программада 5,5 миллиард түхэриг мүнгэ һомолһон хоёр компани эгээн түрүүн хабаадана. Тиигэжэ ажалай 870 һуури байгуулагдаха юм. Хяагта аймагай Хорнхой һууринда «ТЛТ Наушки» компани таможниин-логистикын терминал бариха талаар түсэл бэелүүлжэ эхилээ. Энэ түсэлдэ 725 сая түхэриг һомологдожо, ажалай 100 һуури байгуулагдаха юм. «Ноябрьскпродсервис» компани Кабанск аймагта шубуу үсхэбэрилгын комплекс бариха түсэбтэй. Тэрэнэй бэелүүлгэдэ 4,8 миллиард түхэриг һомологдожо, ажалай 770 һуури байгуулагдаха.
Ородой Холбоото Уласай Алас дурнын тойрогой болон Арктикын хүгжэлтын талаар сайдай орлогшо Сергей Тырцевэй хэлэһээр, энэ яаман Ородой Холбоото Уласай Засагай газарта «Бурятия» гэһэн ТОРО-ой дэбисхэр үргэдхэхэ тухай дурадхал оруулаа. Зохихо шиидхэбэриин абтахада, үшөө найман инвестор Буряадта мүнгэ хүрэнгэ оруулха аргатай болохо.
Алас Дурнын федеральна тойрогой бүхы можо нютагуудта үзүүлэгдэһэн тэдхэмжэнүүдэй ашаар, мүнгэ хүрэнгэ оруулалгын 2273 түсэл бэелүүлэгдэнэ. Алас Дурнын эдэй засагай һалбарида инвесторнууд 1,16 триллион түхэриг оруулжа, ажалай 48,5 мянган һуури байгуулагдаа. Тиихэдэ гүрэнэй тэдхэмжын ашаар, 302 шэнэ үйлэдбэри хүдэлжэ эхилээ.
