230
Пенси, хүүгэдэй тэдхэмжэ
Коронавирусай пандемиин ушарhаа ажаhуугшадые дэмжэхэ Юрэнхылэгшэ эхын капиталда хүртэхэ эрхэтэй гэр бүлэнүүдтэ гурба наhатай болотор хүүгэдтэй бүлэнүүдтэ 5 мянган түхэриг түлэхэ тухай шиидхэбэри абаа. Апрелиин 1-hээ гурбан hарын туршада тэдхэмжэ түлэгдэхэ. Нормативна актнууд абтанхай, түлбэринүүд түлэгдэхэ.
«Энээнhээ гадуур, бусад тэдхэмжэнүүд – хүүгэдэй пособи, ЖКХ, коммунальна туhаламжа болон бусадай талаар хубилалтанууд оруулагдаа – баримталhан дансанууд хэрэггүй. Март соо абаhан хүнүүд hаяын зургаа hарада дансануудые харуулангүй эдэ тэдхэмжэнүүдтэ хүртэхэ. Эрэмдэг бэетэй хүнүүд пенсиеэ абаhаараал абаха, нэсэлтэ баталhан даанса, саарhан хэрэггүй», - гэжэ Алексей Цыденов хэлэбэ.
Больнична хуудаhануудай талаар
«Больнична хуудаhаар түлбэри ажалай намтарhаа болон салингай хэмжээнhээ дулдыдажа, 7000 түхэриг тухай болохо. Юрэнхылэгшын даалгабаринн ёhоор, энэ түлбэри дээшэлүүлэгдэжэ, МРОТ-hоо бага байха ёhогүй, Буряадта энэ тэдхэмжэ 14556 түхэриг. Ажалаар хангагшад хүнүүдтэ мэдээсл тараажа, тэдэнэр өөдынгөө эрхэ мэдэхэ ёhотой, Ажалай инспекции – хинаха», - гэжэ Алексей Цыденов хэлэбэ.
Ажалгүй хүнүүдтэ түлэгдэдэг тэдхэмжэ дээшэлүүлэгдээ
Юрэнхылэгшын шиидхэбэреэр ажалгүй хүнүүдтэ түлэгдэдэг тэдхэмжэ 1,5 дахин МРОТ хүрэтэр дээшэлүүлэгдээ. Буряад уласта энэ тэдхэмжэ 9600 түхэригhөө 14556 түхэриг хүрэтэр, хойто аймагуудта 15769 түхэриг хүрэтэр нэмэгдэхэ.
Ажалаар хангадаг албануудай «халуун утаhанда» хонходожо, мэдээсэл абахада болоно:
- Улаан-Үдын ажалаар хангадаг түб: 8(3012) 41-89-08, 41-89-12, 41-89-24;
- Уласай ажалаар хангадаг албан : 8 (3012) 41-70-41
- Ажалгүй гэhэн бүридхэлдэ орохо талаар зүбшэлгэнүүд: 8(3012) 41-70-41, 41-89-79, 41-89-08.
«Ажалаар хангадаг албанууд ажалай гурим hэлгэнхэйшье hаань, ажалгүй хүнүүдэй тэдхэмжэ таhалгаряагүй, саг соогоо түлэгдэнэ. Тэдхэмжын дээдэ хэмжээ hая ажалгүй болоhон хүнүүд, 26 долоон хоногто таhалгаряагүй хүдэлhэн хүнүүд абаха аргатай гэжэ тэмдэглэлтэй. Эндэ салингай дунда хэмжээн тухай данса гү, али ажалай дэбтэрээр гэршэлэгдэхэ. Бэшэ хүнүүд тэдхэмжын доодо хэмжээн 1800 түхэриг абаха юм», - гэжэ уласай ажалаар хангадаг албанай хүтэлбэрилэгшэ Александр Башкирцев хэлэбэ.
