949
Дээдэ һургуулияа түгэсхэһэн залуу эмшэд хүдөө руу «Земский доктор» гэжэ программаар ошоно. Тус программын ашаар хүдөөгэй эмнэлгын газарнууд мэргэжэлтэдээр нилээд хангагдана. Жэшээнь, Мухар-Шэбэрэй түб больница һүүлэй хоёр жэлэй турша соо 30 эмшэнтэй болоо гээд, больницын ахамад врачай орлогшо Т.Д. Эрдынеева дуулгаба.
- Татьяна Дашибыловна, залуу эмшэдтнай хэр зэргэ хүдэлжэ байнаб?
- Бэрхэнүүд. Залуу басагаднай айл бүлэ байгуулаад, нарайлха болоод, амаралтада гарашана. Теэд яахаб, үхибүүдэй олон боложо байхада, һайн гүб даа.
- Аймагай түб больницада мэргэжэлтэд дуталдаһаар гү?
- Эндокринолог, акушер-гинеколог, хирург, анестезиолог хэрэгтэй. Тиихэдэ эмшэдтэ туһаламжа болодог медсестранууд айхабтараар дуталдана. Илангаяа эмшэдые байлгаха гэрнүүд бии һаань, медсестрануудые байлгаха гэр-байра үгы. Тиимэһээ тусхай хамтын байра бариха тухай шиидхэбэри абтанхай. Арайл мүнгэн үгыл даа.
- Хэды үбшэнтэниие багтааха аргатайт?
- 158 хэбтэритэйбди. Тиихэдэ үшөө 20 хүниие багтаадаг терапевтическэ таһаг Берёзкодо байгуулаатай. Тэндэ эмнэлгэ гараһан аад, үшөө хүсэд эдэгээгүй зон амарна.
- Һайн даа. Ажалтнай амжалтатай ябаг лэ.
