​«Хүнүүдые аргалха гэһэн онсо үүргэтэй»

гэһэн ехэ удха шанартай хөөрэлдөө тээмэндэ үүсхэһэн Крымэй Курортнуудай болон аяншалгын талаар мини­стрэй орлогшо Игорь Котляр Крымэй амардаг, аргалдаг эмхинүүд тухай онсолһон байна. Журналистнуудтай уулзалгада хабаадаһан Буря­ад Республикын экономикын министр Татьяна Думнова, мүн Аяншалгын болон ама­ралгын талаар харюусалгатай дарга Людмила Максанова, тиихэдэ Крымэй Республи­кын зүгһөө харюусалгата хүтэлбэрилэгшэд – эконо­микын министр Светлана Верба, Курортнуудай болон аяншалгын талаар министрэй орлогшо Игорь Котляр гэгшэд ябуулагдажа байһан ажал хэрэгүүдтэеэ танилсуулба, эндэ сугларһан журналистну­удай асуудалнуудта харюуса­ба. Аяншалгын асуудалнууда­ар Улаан-Үдэдэ үнгэргэгдэһэн ээлжээтэ республиканска выставкэ-яармагта хабаа­далсажа, өөһэдынгөө ажал­тай дүтөөр танилсуулһан крымэйхид аяншалгын болон амаралта эмхидхэлгын талаар ерээдүйн харилсаата ажалдаа үндэр сэгнэлтэ үгэбэ.

“Илангаяа хүүгэдые, эрэм­дэг бэетэй үхибүүдые Сим­феропольдо аргалха эрхэ нүхэсэл олдохо. “Байкал­банкын” филиал Крымдэ нэ­эхэ арга олгогдохо байха. Тиимэһээ хамтын проектнүүд, программанууд һаяын сагта табигдаха. Тэрэшэлэн ажалаа һайнаар харуулһан предпри­ятинуудай продукци, эдеэ хоол тэндэ худалдаха арга боломжонууд олдохо байха. Жэшээнь, «Бурятмяспро­мой», «Ажур-тексын» г.м. эмхинүүдэй бүтээлнүүд тэндэ худалдагдажа болохо. Үгышье һаа, манай “Стальмост” заво­дойхид тэндэхи аяншалга­да тон хэрэгтэй Керчинскэ хүүргэ барилсаха аргатай, хоёр хотонуудай хоорондын сэхэ авиарейснүүдые хэхэ гэхэһээ эхилээд, дэлгүүрэй асуудалнуудые хамта шиид­хэхэ аргатайбди” гэжэ Т.Г. Думнова тэмдэглээ.

“Танай курортнуудта амар­хада дан үнэтэй байжа, Таи­ланд ошоо һаа дээрэ, үнэгүй байхадаа, магадгүй” гэһэн журналистын асуудалда харюусаһан Игорь Котляр иигэжэ онсолоо: “Манай Кры­мэй курортнууд болон санато­ринуудай онсо илгаа гэхэдэ, тэндэмнай хүнүүдые ганса амаруулха бэшэ, харин аргал­ха гэһэн гол үүргэ бэелүүлдэг шуу. Манай үхибүүд Байгал далай амархаа ерэхэ, харин Крымэй амаралтын газарну­удта, тэрэ тоодо Бүхэсоюзна удхатай байһан “Артек” гэһэн алдар суута хүүгэдэй ла­герьтэ Буряад Республикын үхибүүд, залуушуул амархаар уригданхай.”

Крымэй түүхын болон үзэсхэлэн гоё газарнуудта, һайхан музейнүүдтэ үндэр сэгнэлтэ Людмила Макса­нова үгэһэн байна. Тиигэжэ ерээдүйдэ хамтын ехэ түсэб, зорилгонуудые хараалһан ма­най республикын болон Кры­мэй Республикын дарганар үшөө һонин уулзалгануудые дээдэ һургуулинуудта, хотын предприятинуудта үнгэргөө, хани харилсаата ажалайнгаа программануудые баталаа.

Радна-Нима Базаровай фото