​ОЮУТАД АЖАЛДАА ГАРАБА

Апрель һарын һүүлшын ажалай үдэр Улаан-Үдын Арбат дээрэ оюутадай ажалай бүлэгүүдэй хаһа нээгдэһэн байна.

Буряад Уласта түрүүшын оюутадай ажалай бүлэгүүд үшөө 1967 ондо байгуулагдаа бэлэй. Тиихэдэ 81 бүлэг хүдэлөө һэн. Тэрэ гэһээр оюутад зунайнгаа хаһада ажал хэжэ үнгэргэнэ.

Мүнөөшье жэл 400 гаран хүбүүд, басагад түрэл хотоёо сэбэрлэлгын хүдэлмэридэ ябалсаха. Юуб гэхэдэ, сентябрь һарын эхеэр манай ниислэл байгуулагдаһаар 350 жэлэйнгээ ой тэмдэглэхэнь гээшэ. Тиимэһээ оюутад тон харюусалгатай ажал хэхэнь ха юм. Гэхэтэй хамта, оюутад заншалта ёһоороо Камчатка болон Сахалин ошожо, загаһанай үйлэдбэридэ хүдэлхэ, түмэр харгыда поезд соо проводнигаар ябалсаха. Гадна 2018 ондо үнгэргэгдэхэ футболоор дэлхэйн чемпионадта бэлэдхэл ябуулагдажа байна гэжэ булта мэдэнэбди. Тиигэжэ Росси дотор олон стадионууд баригдажа, һэльбэн шэнэлэгдэжэ байна гээшэ. Тэндэшье ажалда гараха дуратайшуул үсөөн бэшэ. Зунай амаралтын болон элүүржүүлгын лагерьнуудта хүмүүжүүлэгшээр эрдэм һуралсалай гуламтануудай оюутад хүдэлхэ болоно.

Оюутадай ажалай хаһын нээлгын үедэ Улаан-Үдэ хотын Ветерануудай соведэй түрүүлэгшэ Виктор Гущинай хэлэһээр, олон хүбүүд, басагад анха түрүүшынхиеэ ажалда гарахань. “Эгээл эндэ манай эдиршүүл ажалда дуратай болоно”, - гэжэ аха захатан тэмдэглээ.