1142
Һаяхан Буряадай эрдэмэй түбтэ буряад хэлээр эрдэмтэдэй дунда олимпиада үнгэрбэ.
Энэ хэмжээ ябуулга хадаа Монгол арадые, буддын шажан болон Түбэд орониие шэнжэлдэг хүреэлэнгэй хэлэ бэшэгэй таһагай ажалшад эмхидхэжэ (Б. Д. Цыренов), буряад хэлэнэй габшагай һарын шугамаар анха түрүүшынхиеэ үнгэргэбэ. Тус үйлэ хэрэгые Эрдэмэй түбэй захиргаан болон профсоюзна комитет дэмжэлсээ. Эндэ буряад хэлэн, буряад арадай ажабайдал, ёһо заншал, соёл болбосоролдо хабаатай ехэ һонин лексикээр хорин асуудалнууд, мүн тиихэдэ арбан таабаринууд, табан оньһон үгэнүүд оролсоһон байна. Олимпиада тестын түхэлтэйгөөр үнгэрһэн байна. Эндэ хэлэ бэшэгэй болон уран зохёолой талаар мэргэжэлтэн хабаадаагүй. Дүн хамта Эрдэмэй түбэй бүхы һалбаринуудай элдэб наһанай 29 мэргэжэлтэд хабаадаа. Эгээл наһатайнь профессор, химиин эрдэмэй доктор, Буряад Уласай болон Россиин эрдэмэй габьяата ажалшан, член-корреспондент РАЕН Жибзема Гармаевна Базарова (1935 оной) хабаадалсаа.
Олимпиадын дүнгүүдээр түрүүшын һуурида фармокологиин эрдэмэй кандидат Пунцык-Нима Базыровна Лубсандоржиева, хоёрдохидо физико-математикын эрдэмэй доктор Балдандоржо Дашиевич Цыдыпов, гурбадахида юрэнхы болон туршалгата биологиин хүреэлэнгэй захиралай орлогшо Доржо Дымбрынович Мункуев, тиихэдэ түүхын эрдэмэй кандидат Дамдин Доржиевич Бадараев, физико-математикын эрдэмэй доктор Баир Гармаевич Базаров гэгшэд онсолон һайшаалай тэмдэгүүдээр шагнагдаа.
- Энэ ехэ һонин хэмжээ ябуулга эмхидхэһэн Бабасан Доржиевич Цыреновтэ һайниие хүргэхэ байнаб. Эрдэмэй түбэй сангай танхим соо сүлөө һууригүй байһандань баясамаар байгаа. Үнэн дээрэ буряад хэлэндээ һанаагаа зободог, хэлэеэ мэдэдэг хүнүүд манай дунда олон ха юм гэжэ эндэ харагдаба, ойлгогдобо гээшэ. Эндэ илангаяа таабаринуудай заабари олондо һайшаагдаа. Эрдэмтэд хадаа булта өөр өөрынгөө урдахи ажалаа хараад лэ ябахадаг зон гээшэбди. Харин энэ үйлэ хэрэг бидэниие нэгэдүүлжэ, үндэһэн буряад ухаан бодолыемнай һэргээгээ гэхэдэ, алдуу болохогүй гэжэ һанагдана. Иимэнүүд хэмжээ ябуулганууд саашадаа заншалта болон үнгэргэгдэжэ байха бэзэ гэжэ найданаб, – гэжэ Балдандоржо Дашиевич Цыдыпов хэлэнэ. Тиихэдэ бэшэшье хабаадагшадай талаһаа иимэрхүү үйлэ хэрэгүүдые, жэшээнь, буряадуудай һайндэр Сагаалган г.м. үнгэргэжэ байя гэһэн мэдүүлэлнүүд ороһониинь ехэ һайшаалтай байна.
Елена Дамдинова, "Буряад Yнэн"
