457
Мэдээжэ гүрэн түрын болон олониитын ажал ябуулагша Владимир Бизьяевич Сагановай мүнхэ дурасхаалда зорюулагдаһан хэмжээ ябуулганууд Буряад Уласта мартын 10-да эмхидхэгдэбэ. Тэрэ амиды мэндэ ябабал, мартын 7-до 80 наһатай болохо байгаа.
Энэ хүн хэһэн ажалаараа олоной зүрхэ сэдьхэлдэ үлэнхэй. Тиимэһээ Буряадай ниислэлэй түбтэ Владимир Сагановта хүшөө нээгдэһэниинь гайхалгүй.
Суг хамта хүдэлжэ гараһан Михаил Иннокентьевич Семёнов, Владимир Константинович Агалов болон бусад дурасхаалай һайхан үгэнүүдые хэлэһэн байна. Түнхэнэй аймагай депутадуудай Соведэй түрүүлэгшэ Аламжи Сыренов тус хүшөө бэлдэлгэдэ туһа хүргэһэн һайн һанаатай хүнүүдтэ баярые хүргөө.
Буряад Уласай Засагай газарай танхим соо Ардан Лопсонович Ангархаевай бэшэһэн номтой танилсалга болоо. “Владимир Саганов: штрихи к портрету” гэһэн номынь олоной анхарал татаад, олониитэдэ тон хэрэгтэй хэблэл гэжэ олон хабаадагшад тэмдэглээ.
Дэлгүүрэй харилсаануудта орожо байһан хүнгэн бэшэ сагта Владимир Бизьяевич Буряадай АССР-эй Министрнүүдэй Соведые шадамар бэрхээр хүтэлбэрилөө гэхэдэ, алдуу болохогүй, - гэжэ Буряадай Уласай Засагай Түрүүлэгшын нэгэдэхи орлогшо Иннокентий Матвеевич Егоров һанамжаараа хубаалдаа.
Буряад драмын академическэ театрта болоһон хэмжээ ябуулгада Владимир Сагановай түрэл Түнхэн нютаг тухай олон дуунууд зэдэлээ, Саяан хадын хормойһоо уг гарбалтайшуул бэлиг шадабарияа танхимаар дүүрэн сугларһан уладта харуулаа. Мүн тиихэдэ Түнхэнһөө “Хэнгэргэ” гэһэн аман зохёолой ансамблиин хэмжээндэ хабаадалсаһаниинь һайшаалтай.
Эдэ бүхы хэмжээ ябуулганууд Владимир Бизьяевич Саганов арад зоной дунда тон хүндэтэй, сэнтэй хүн ябаа гэжэ үшөө дахин гэршэлбэ.
Борис БАЛДАНОВ
Авторай фото-зураг
