614
“Аза хүсэл” гэһэн үгэнүүдые дуулаад, К.М. Черемисовэй хэблэһэн 44 000 үгэтэй “Буряад-ород толи” уудалжа харахада, иигэжэ бэшээтэй: “аза” гээшэнь – счастье, удача, харин “хүсэл” гээшэнь - желание, стремление. Үргэлжэлүүлэн хэлэбэл: удачное, счастливое желание и стремление. Буряадаар дүүрэнээр тайлбарилбал: жаргалтай, урагшатай хүсэл, эрмэлзэл. Буряадаар, ородооршье яһала удхатай һайхан үгэнүүд гээшэл даа.
“Аза хүсэл” гэжэ нэрэтэй аман зохёолой бүлгэм оройдоол гурбан жэлээ дабажа ябана. Түрэл баян хэлэндээ дуратайшуул арадайнгаа нарин нягта, гүнзэгы удхатай ёһо заншалнуудые үргэжэ, мүн хүгжөөжэшье ябадаг багша мэргэжэлтэй ЛВРЗ-гэй шэрэм шудхалгын цехэй мастер байһан Чингиз Гармаев, уран гартай оёдолшо Цызема Разуваева Хурамхаанһаа, ВСГАКИ дүүргэһэн мэргэжэлтэ Александр Николаев, РЖД-гэй харуулшан Юрий Маласов Кабанскын аймагһаа, медсестра ажалтай Октябрина Хандирова, мүн парикмахер мэргэжэлтэй Виктория Маласова Түнхэнһөө, соёлой ажалтай ябаһан Намсалма Намдакова, инженер-технолог мэргэжэлтэй Цындема Цыбенова Агын тойрогһоо, зоотехник мэргэжэлтэй Любовь Тугутхонова Хэжэнгэһээ, багша Валерия Бабкинова Эрхүү можоһоо болоно.
Иимэ янза бүриин ажалтай байһан, элдэбын тоонтотойшуул суг боложо, гурим заншалаа һургуулиин үхибүүдтэ, залуушуулда, арад зондоо ойлгуулжа, харуулжа ябагшад, энэ жэлэй март һарада гурбадахи жэлээ дабагшад, Буряадайнгаа аман зохёолой бүлгэмүүдэй дунда онсо һуури эзэлнэ.
2015 оной февралиин 13-да БГТРК-гай «Толи» дамжуулгада хадагуудай удха харуулаа, «АТВ-Байкал» телеканалаар «Төөлэй табилга”, “Сай шаналга”, “Гуламта тахилга”, “Сагаалганай уулзалга” гэһэн гуримуудые харуулһан байна.
Зүүн зүгэй медицинын, кардиологическа түбүүдтэ, олон һургуулинуудта уянгата уялгануудые, ёһо заншалнуудые харуулжа, ойлгуулжа, һургажа ябадаг буянтайшуул мүн Үндэһэтэнэй номой сангай ажалшадай урилгаар олон уулзалгануудта хабаадалсадаг юм.
Хүнэй наһанай долгиндо ямарханшье сагууд дайралдадаг, теэд дуу дуулахые шагнажа, сэдьхэл дүүрэдэг гээшэнь элитэ.
Монгол туургатанай дунда һайхан хоолойтойшуул олон гэжэ мэдээжэ. Тиимэһээ ирагуу дуунуудаараа арадаа баясуулхын аргын байһан хада “Аза хүсэл” бүлгэмдэ ерэжэ, эбтэй эетэйшүүлээр хамтаржа дуулыт гэжэ уряалнабди.
Нарин нягта зантай элинсэгэймнай ажабайдалайнь үзэгдэлнүүд жэшээ болохо үзэмжэтэй, мүн сагай ошохо бүри мүлиржэ, аза хүсэлэй ба хүсэнэй ёһоор ябталагдаха гэһэн найдал мүндэлнэ.
Урагшаа гэһэн зорилготой бүлгэмэй тогтоогдохоһоо эхилжэ хүтэлһэн Валерия Осиповна һонин һонин удхатай бүтээлнүүдые зохёожо табяа. Мүн Үндэһэтэнэй номой сангай хүтэлбэрилэгшэдэй, ажалшадай дэмжэлгэ һайшаалтай байһаниинь элитэ.
Тиимэһээ “Аза хүсэл” бүлгэмэйхидтэ, номой сангай ажалшадта олон тоото харагшадынь ажалдань амжалта, ажабайдалдань амгалан тайбаниие үнэн зүрхэнһөө хүсэнэ.
Гажидма АЮШЕЕВА
Зураг дээрэ: аман зохёолой “Аза хүсэл” бүлгэм.
