639
Хабар боложо, дулаан сагай тогтобол, Ивалгын аймагта Янгаажанай дасан һэргээгдэжэ эхилхэ тухай Бандида Хамба лама Дамба Аюшеев мэдүүлбэ. Тус дасанай һуурин дээрэ эндэхи газарай эзэн болохо Очирдари ламын Ордон нэн түрүүн бодхоогдохо юм.
Энээн тухай Ивалгын дасанай шэрээтэ Буда лама Цыденовтэй болон “Оронго” гэһэн нютагай захиргаанай толгойлогшо Жамсо Цыремпиловтэй хөөрэлдөөд байнабди. Түүхын хуудаһа ираад харахада, Янгаажанай дасан Этигэл хамба ламатай нягта харилсаа холбоотой. Этигэл хамба хадаа “Сансарын эзэнтэй уулзажа хөөрэлдэхэдэ, тон хүшэр” гэжэ хэлэгшэ һэн. Харин энэ томо Ордон бодхооходомнай, ламанарта, арад зондо Сансарын эзэнтэй уулзаха һуури дэлгээгдэхэнь ха юм, - гэжэ Дамба Аюшеев тайлбарилна.
Оронго һууринай буддын шажанай эблэлэй ахалагша Зандра Гомбожапович Бадмаевай хэлэһээр, нютагай зон энэ ушараар тон ехээр баярлажа байна гээшэ. “Нютагаймнай ажаһуугшад, өөрын хэрэг эрхилэгшэд булта хамтаржа, хандиб дамжуулжа байна. Дулаан болохолоор лэ, ажалнууд эхилхэ. Олоной хүсөөр заал һаа бодхоожо шадахабди”, - гэжэ Зандра Бадмаев хэлэнэ.
Оронгын арад зон бултадаа буддын шажанай ажал ябуулгада эрхимээр хабаадана гэхэдэ, алдуу болохогүй. Эндэ Зандра Гомбожапович аргагүйгөөр ниитын ажал ябуулна гээшэ.
Сахюусанаа хиидхэхэ саг ерэхэдэ, хуралнууд хурагдана. Эндэ ламбагайнартай хөөрэлдэжэ, саг хэлсэгдэнэ. Мүн тиихэдэ хурал уншаха газар бэлдэгдэнэ.
Майдариин хурал манай Оронго нютагта таһалгаряагүйгөөр 20 гаран жэлдэ боложо байдаг. Тэндэ ходо юумэ бэлдэхэш. Мүн тиихэдэ сентябрь һара соо Этигэл хамба ламада зорюулагдаһан хэмжээ ябуулгануудта ехэхэн эмхидхэлэй ажал хэгдэнэ гээшэ, - гэжэ нютагай эдэбхитэн Зандра Бадмаев хөөрэнэ.
Оронгынхид түрэл нютагтаа “Алтан Гэрэл” гэһэн томо ном уншуулха тухай үдэр гаргаба. Тиимэһээ олон ламанар Оронгодо апрелиин 16-да буухань. Энэ хуралда бүхы Оронгын, дүтэ нютаг нугануудай һүзэгшэд хабаадахаар хараалагдана.
Борис БАЛДАНОВ
