​«Даши Чойнхорлин» дасанай дэргэдэ үхибүүдтэ ушу заагдаха

Түгнын талада саг ондоогоор ябаһан шэнги. Хон-жэн. Хүнэй хөөрсэгэнөөнһөө эндэл тэрьелхээр. Тээ саана хагда зулгааһан адуу мал адаглаһаар байтараа, хүл дорохиёо алдажархибаб: хажууһаам талын тарбаган харгы хүндэлэн гараад, үнөөхил нүхэн руугаа шургашаба. Халагни, зурагынь абажа үрдибэгүйб… Бодоод үзэхэдэм, ажабайдалдашье иимэрхүү түхэлэй ушарнууд нилээн дайралдана. Тиимэһээ даб гээд, холын түсэб эрьюулэнгүй, дүтынхиеэл бэелүүлжэ байя. Эгээл иимэ шиидхэбэри Баян-Харын үбэртэ үндэрлэжэ байһан «Даши Чойнхорлин» дасанай дэргэдэ абтаа.

Хитадай «Шаолинь» дасанай маягаар ажалаа эрхилхэ гэһэн түсэбөө Баясхалан лама хүсэлдүүлжэл байнхай. Тиигэхын тулада эхиндээ дасанайнгаа дэргэдэ үхибүүдые элүүржүүлгын лагерь байгуулха хүсэлтэй. Тэрэ лагерьта эдиршүүл ушугаар бэеэ һорихоһоо гадуур хитад болон англи хэлэ шудалдаг байха. Мүнөө дээрээ ушу заахаар бэлэн тренер олдонхой. Хяагтын һургуулиин бэрхэ багша Рашид Даутов уригданхай.

Теэдшье эмхидхэлэй ехэ ажал хүлеэнэ. Мухар-Шэбэрэй засаг түрын түлөөлэгшэд, тэдэнэй тоодо хүдөө нютагуудай гулбаанар, мүн эдэбхитэд энэ хэмжээ эрхилхэ талаар арга мүр бэдэрэлсээ.

Буряад Уласай Арадай Хуралай депутат, Мухар-Шэбэрэй аймагай түб больницын ахамад эмшэн Александр Варфоломеевэй һанамжаар, Роспотребнадзорой хамаг эрилтэдэ хүрэхэнь бэрхэтэй байха. Илангаяа уһанай шанар тааруулхаһаа эхилээд, хажуудахи ой модондо хоро хаяжа, хашагһаа сэбэрлэлгэ хэхэ гэхэ мэтын эрилтэнүүд бии. Теэдшье эдэ олон эрилтэнүүдэй заримыень тойроод гарахаар. Жэшээнь, хажуудахи Түгнын һургуулиһаа бэлэн эдеэ асаруулаад, хоол барилгын байшан доторхи шэрээнүүд дээрэ аяга, табаг руу хэжэ тараагаад, эдюулжэ байхада болоно.

Дасанай дэргэдэ хоол барилгын байшан бодонхойшье һаа, үхибүүдые байлгаха байра бариха хэрэгтэй. Тиимэһээ ерэхэ зундаа дасанай туг доро ушугаар бэеэ һорилгые «Берёзка» лагерьта эрхилхэ тухай хэлсэбэ. Зүгөөр нүгөө жэлдэ найман ханатай томо байшан дасанай дэргэдэ бодохо аабза. Тэрээн дотор үхибүүд байрлаха юм. Бүтэн жэлэй туршада эмхидхэлэй ажал эршэтэйгээр ябуулагдаад, Баян-Харын үбэртэ үхибүүдэй лагерь үүдээ сэлин нээһэй!